Քաղաքական հետապնդման եմ ենթարկվում․ Ռուբեն Վարդազարյան

Նույնիսկ զարմանալի էր այդ 6 ամիսը ինչո՞ւ, դատախազը երկու տարի էր պահանջել։ Այս մասին ճեպազրույցի ընթացքում ասել է ԲԴԽ նախկին նախագահ Ռուբեն Վարդազարյանը, որն այսօր դատարանի որոշմամբ դատապարտվեց ազատազրկման՝ 1 տարի 6 ամիս ժամկետով։

Նա նշեց, որ երբ որոշումն օրինական ուժի մեջ մտնի, ինքը բանտ կգնա։

«Իհարկե, սպասելի էր․ քանի պատվերը կար, այսպես էր լինելու։ Բողոքարկում կա Վերաքննիչ դատարան, հետո Վճռաբեկ դատարան, 2–3 ամիս ունենք առջևում»,– ասաց ԲԴԽ նախկին նախագահը։ 

Վարդազարյանի խոսքով՝ դատավոր Վահե Դոլմազյանն ավելի ամրապնդեց իր այն պնդումը, որ հետապնդումը քաղաքական է։

«Այդ դատաքննությունը լրացնելու հիմքով դատավարությունը վերսկսելու պրոցեսն ինքնին ապացույց է, որ քաղաքական հետապնդման եմ ենթարկվում, որովհետև փորձ արվեց լրացուցիչ ապացույց ձեռք բերել՝ չունենալով այդ ապացույցն արդեն մեկ անգամ ավարտված պրոցեսի արդյունքում»,– ասաց Վարդազարյանը։

Նա վստահություն հայտնեց, որ Վերաքննիչ դատարանն ու Վճռաբեկ դատարանը վճիռները թողնելու են անփոփոխ։ 

Անդրադառնալով քաղբանտարկյալների շարքին համալրելուն՝ Վարդազարյանն ասաց․ «Դրան կարող է անդրադառնալ Եվրոպական դատարանը, որևէ կերպ հայկական ատյաններն այդքան համարձակություն չունեն, որ կոչեն այս պրոցեսը քաղաքական հետապնդում»։

Հակակոռուպցիոն դատարանում, նախագահությամբ դատավոր Վահե Դոլմազյանի, այսօր hրապարակեց ԲԴԽ նախկին նախագահ Ռուբեն Վարդազարյանի գործի վճիտը:

Դատարանը Ռուբեն Վարդազարյանին մեղավոր ճանաչեց 2021 թվականին ընդունված Քրեական օրենսգրքի 486-րդ հոդվածի 2 մասի 2 կերտով նախատեսված հանացանքի կատարման մեջ՝ արդարադատության իրականացմանը կամ գործի քննությանը միջամտելը իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով։

Ռ.Վարդազարյանի նկատմամբ նշանակվեց պատիժ ազատազրկում 1 տարի 6 ամիս ժամկետով, որպես լրացուցիչ պատիժ՝ տեղական կամ պետական ինքնակառավարման մարմիններում պաշտոններից զբաղեցնելու իրավունքից զրկել 2 տարի ժամկետով։

Վարզազարյանի նկատմամբ կիրառված խափանման միջոց՝ չհեռացման մասին ստորագրությունը մնաց անփոփոխ մինչև դատավճռի օրինական ուժի մեջ մտնելը։