Սոնա Մնացականյանի հայրն արձագանքել է Փաշինյանի՝ ավտոշարասյան վերաբերյալ հայտարարությանը

Վարչապետին ուղեկցող ավտոմեքենայի հարվածից մահացած հղի կնոջ հայրը՝ Մնացական Մնացականյանը, այսօրվա դատական նիստից հետո լրագրողների հետ զրույցում ասել է՝ ապացուցված է, որ վարորդը գերազանցել է սահմանված արագությունը:

«Միջոցեր չի ձեռնարկել վթարը կանխելու համար: Ինքը մեղավոր է ու ոչ միայն ինքը: Իմ դատապաշտպանի օգնությամբ նաև շարասյան ղեկավարների նկատմամբ ենք բողոք ներկայացրել»,- ասել է նա:

Անդրադառնալով Նիկոլ Փաշինյանի այն հայտարարությանը, որ ինքը կապ չունի այդ ավտովթարի հետ, Մնացականյանը նշել է․ «Ինքն էդպես է մտածում։ Չգիտեմ՝ ինչու։ Ո՞նց եղավ, որ ինքն էդպես է մտածում։ Նիկոլ Փաշինյանի համար կարելի է անվտանգություն ապահովել, անցորդները ՀՀ քաղաքացի՞ չեն, որ անվտանգություն ապահովեն»։

Հարցին՝ Նիկոլ Փաշինյանը մեղավո՞ր է, թե՞ ոչ, արձագանքել է. «Մենք իրավական պետության մեջ ենք չէ՞ ապրում, թող իրավական պետությունն էլ որոշում կայացնի»:

Նա նաև նշել է, որ Փաշինյանը ներողություն է խնդրել իրենից, ցավակցել:

Հիշեցնենք, որ հուլիսի 16-ին կայացած ասուլիսում Փաշինյանը մասնավորապես հայտարարել էր.

«Դա իր ավտոշարասյունը չէ, դա Հայաստանի վարչապետի «ավտոբուսն է», Հայաստանի վարչապետի անվտանգությունն ապահովող ինստիտուտն է։ Դա էլ իմ հանրային տրանսպորտն է, որ ինձ հատկացված է։ Կան պրոտոկոլներ այդ շարժումն ապահովելու համար, ինչ կապ ունի դա ինձ հետ, ընդհանրապես։

Ես հլը մեքենաներից մեկին ղեկին եղած լինեի..․ հասկանամ՝ ինչ կապ ունեմ դրա հետ։ Ես նստած եմ ինձ սպասարկող մեքենայի մեջ ու երեք մեքենա այն կողմ տեղի է ունենում շատ ցավալի դեպք։ Ասենք, դուք մետրոյի վերջին վագոնում նստած եք, առաջին վագոնը գնում, մարդ է վրաերթի ենթարկում, ի՞նչ կապ ունեք այդ դեպքի հետ»։