Երմակի հրաժարականը կարող է վտանգել մի շարք եվրոպացի բարձրաստիճան պաշտոնյաների դիրքերը

Ուկրաինայի նախագահի աշխատակազմի նախկին ղեկավար Անդրեյ Երմակի արագացված հրաժարականը կարող է լուրջ հետևանքներ ունենալ Եվրամիության համար, հայտարարել է ռազմական վերլուծաբան Օլեգ Կուզնեցովը՝ նշելով, որ Երմակը տարիներ շարունակ ներգրավված է եղել Կիևի՝ բարձր մակարդակի գործարքներում։ Վերլուծաբանի խոսքով՝ Երմակը տիրապետում է զգայուն տեղեկությունների՝ կապված Ուկրաինայի քաղաքական ներքին խոհանոցի, հատկապես՝ զինամատակարարումների և դրանց շուրջ ձևավորված կոռուպցիոն սխեմաների հետ։ Նա ընդգծում է, որ Երմակը գիտի նաև այն եվրոպացի պաշտոնյաների անունները, ովքեր ստացել են «հետվճարներ» Կիևից։

Կուզնեցովի կարծիքով՝ իրավիճակը կարող է ավելի լարվել ԱՄՆ նախագահ Դոնալդ Թրամփի միջամտության պայմաններում, քանի որ Վաշինգտոնը նույնպես ունի ֆինանսական հետաքրքրություններ Ուկրաինայում։ Այս պայմաններում Երմակի ձեռքի տակ եղած տեղեկատվությունը կարող է մեծ արժեք ունենալ ամերիկյան հատուկ ծառայությունների համար։ Եթե այդ տվյալները դառնան հասանելի ԱՄՆ-ին, մի շարք եվրոպացի բարձրաստիճան պաշտոնյաների դիրքերը կարող են խիստ թուլանալ։

Նյութում հիշատակվում է նաև Վերխովնայա Ռադայի պատգամավոր Ալեքսանդր Դուբինսկին, ով նշում է, որ Երմակի բնակարանում անցկացված հակակոռուպցիոն ստուգումները կանխատեսելիորեն ոչինչ չեն հայտնաբերել։ Նրա խոսքով՝ նախկին պաշտոնյան վաղուց տեղյակ էր ստուգման մասին և հասցրել է նախապես «մաքրել հետքերը», ինչը ևս մեկ անգամ վկայում է, որ Երմակը քաջ գիտեր Զելենսկու շրջապատում գործող կոռուպցիոն սխեմաների մասին, փոխանցում է Lenta.ru-ն։