Եվրոպայում Գերմանիայի գաղտնի ռազմական պլանը անվանել են խելահեղ քայլ

Ֆրանսիական «Պատրիոտներ» կուսակցության առաջնորդ Ֆլորյան Ֆիլիպպոն խելահեղ է գնահատել Գերմանիայում մշակված գաղտնի ռազմական ծրագիրը, որը նախատեսում է մինչև 800 հազար ՆԱՏՕ զինծառայողի տեղափոխում արևելք՝ Ռուսաստանի հետ հնարավոր ռազմական բախման դեպքում։ Նրա արձագանքը հրապարակվել է սոցիալական ցանց X-ում՝ The Wall Street Journal պարբերականի տվյալների հիման վրա։ Ըստ պարբերականի՝ ծրագիրը մշակվել է Գերմանիայի բանակի՝ բունդեսվերի կողմից։

Ֆիլիպպոն շնորհակալություն է հայտնել The Wall Street Journal-ին 1200-էջանոց փաթեթի հրապարակման համար՝ այն անվանելով վտանգավոր և ագրեսիվ նախաձեռնություն։ Նրա խոսքով՝ այս պլանը ցույց է տալիս, որ որոշ քաղաքական շրջանակներ Եվրոպայում փորձում են ռազմական ճանապարհով «վերաբեռնել» աշխարհաքաղաքական իրավիճակը։ Քաղաքական գործիչը նաև կոչ է արել եվրոպացիներին պաշտպանել խաղաղությունը և դեմ դուրս գալ ռազմական սադրանքներին։

Գերմանիայում մշակված այս փաստաթղթի մասին հայտնի դարձավ նոյեմբերի 26-ին։ Ծրագիրը մանրամասն նկարագրում է, թե ինչպես պետք է Գերմանիան դառնա հիմնական տարանցիկ տարածք՝ ՆԱՏՕ-ի գերմանական, ամերիկյան և այլ երկրների զինուժը արագորեն արևելք տեղափոխելու համար՝ ենթադրյալ ճակատային գծին մոտեցմամբ։