Պապ Լեոն այցելել է Ստամբուլի Կապույտ մզկիթ, կոշիկները հանել է, բայց չի աղոթել

Հռոմի կաթոլիկ եկեղեցու առաջնորդ Լեո XIVը Ստամբուլի Կապույտ մզկիթ այցի ընթացքում հանել է իր կոշիկները՝ հարգանքի նշան, սակայն չի կանգնել աղոթքի։ Այցը տևել է մոտ 20 րոպե, որի ընթացքում պապը շրջել է մզկիթի տարածքով՝ իման և Ստամբուլի մուֆթիայի ուղեկցությամբ։ Վատիկանն անակնկալի է եկել  քանի որ այցի ընթացքում աղոթք չի եղել, իսկ Թուրքիայի պետական կրոնական կառույցի՝ Դիանեթ ղեկավարի կողմից նախատեսված ողջույնը չի կայացել։

Մզկիթի գլխավոր մուեզինը՝ Աշքին Մուսա Թունջան, լրագրողներին ասել է, որ պապին առաջարկել է մի պահ աղոթել, սակայն Լեոն նախընտրել է պարզապես շրջել։ Վատիկանը հետագայում հայտարարել է, որ պապը մզկիթում գտնվել է «խորհրդածությամբ և լսելու պատրաստակամությամբ՝ հարգելով վայրը և այստեղ աղոթող հավատացյալներին»։ Այցի ընթացքում Լեոն նաև կատակել է մզկիթի աշխատակիցների հետ՝ նշելով, որ իրեն դուրս են հանում «մի դռնով, որտեղ գրված է No exit»։

Պապի Թուրքիա այցը նրա առաջին արտասահմանյան ուղևորությունն է՝ ընտրվելուց հետո։ Լեոն չի այցելել մոտակայքում գտնվող Այա Սոֆիա տաճարը, ինչը տեղի է ունեցել նախորդ պապական ուղևորությունների ժամանակ։ Նրա ընտրած ուղղությունը կապված է այն փաստի հետ, որ Թուրքիայում նշվում է վաղ եկեղեցական պատմության կարևոր իրադարձության՝ Նիկիայի Տիեզերական ժողովի 1700-ամյակը։ Միջին Արևելքի երկրների հոգևոր առաջնորդների հետ հանդիպմանը Լեոն դատապարտել է կրոնի անունով բռնությունը և շեշտել քրիստոնյաների միասնության անհրաժեշտությունը։