Լեհաստանը ԵՄ–ից պահանջել է 43,7 միլիարդ եվրո՝ ռազմական ծրագրերի համար

Լեհաստանի պաշտպանության նախարարությունը խնդրել է Եվրամիությունից 43,7 միլիարդ եվրո՝ երկրի արևելյան սահմանների ամրապնդման, անօդաչուների ձեռքբերման և այլ ռազմական ծրագրերի համար։ Ինչպես հայտնում է ՏԱՍՍ-ը, այս մասին հայտնել է նախարարի տեղակալ Ցեզարի Թոմչիկը՝ իր գրառմամբ հարթակ X–ում։

Թոմչիկի խոսքով՝ Լեհաստանը գումարը նախատեսում է ստանալ Եվրոպայի միլիտարիզացիայի ծրագրից՝ SAFE, որը նախաձեռնել է Եվրոպական հանձնաժողովի նախագահ  Ուրսուլա ֆոն դեր Լյայենը։ Լեհաստանը ծրագրում է այդ միջոցները ուղղել «Արևելյան վահան» նախաձեռնությանը, հակաօդային պաշտպանության ուժեղացմանը, անօդաչու համակարգերի գնմանն ու երկար տարածքերի հարվածային հնարավորությունների զարգացմանը, ինչպես նաև ռազմական նշանակության տրանսպորտային ենթակառուցվածքների բարելավմանը։

SAFE ծրագրի ընդհանուր բյուջեն կազմում է շուրջ 150 միլիարդ եվրո, որի մոտ մեկ երրորդը Լեհաստանը նախատեսում է օգտագործել սեփական վերազինման և անվտանգության ամրապնդման համար։ Մնացած գումարները կբաշխվեն ԵՄ 18 անդամ պետությունների միջև։ Ծրագիրը ֆինանսավորվում է այն միջոցներից, որոնք ի սկզբանե նախատեսված էին կլիմայական նախագծերի և թվային տեխնոլոգիաների զարգացման համար։