Լեհաստանի վարչապետը հիշեցրել է, որ ՆԱՏՕ-ն ստեղծվել է որպես հակազդող դաշինք Ռուսաստանի դեմ

Լեհաստանի վարչապետ Դոնալդ Տուսկը սոցիալական հարթակ X-ում գրել է, որ ՆԱՏՕ-ի հիմնադրման հիմքում եղել է Արևմուտքի պաշտպանությունը խորհրդային, այսինքն՝ ռուսական ագրեսիայից։ Նրա խոսքով՝ դաշինքը կառուցվել է միասնության և փոխադարձ աջակցության վրա, ոչ թե առանձին երկրների շահերի։ Տուսկը նշել է, որ հույս ունի՝ այս սկզբունքները չեն փոխվել։

Նա իր անդրադարձում հիշեցրել է դաշինքի իրական առաքելությունը՝ ընդգծելով, որ ՆԱՏՕ-ի ուժը միշտ հիմնված է եղել հավաքական անվտանգության գաղափարի վրա։ Վարչապետի խոսքերը հնչել են այն ֆոնին, երբ Եվրոպայում ակտիվացել են անվտանգության և ռազմական սպառնալիքների շուրջ քննարկումները։

Ավելի վաղ Լեհաստանի պաշտպանության նախարարության տեղակալ Ցեզարի Թոմչիկը հայտնել էր, որ երկրին անհրաժեշտ է շուրջ 43,7 միլիարդ եվրո՝ սահմանների ամրապնդման, անօդաչուների ձեռքբերման և ռազմական այլ կարիքների համար։ Գումարը նախատեսվում է ստանալ Եվրոպայի միլիտարիզացիայի SAFE ծրագրի շրջանակում։