Թեհրանը, Մոսկվան ու Բաքուն Հյուսիս-Հարավ երկաթուղային միջանցքի զարգացման մասին հուշագիր են ստորագրել

Իրանի Իսլամական Հանրապետությունը, Ռուսաստանի Դաշնությունը և Ադրբեջանը Բաքվում ստորագրել են համագործակցության եռակողմ հուշագիր՝ ուղղված Հյուսիս-Հարավ միջազգային տրանսպորտային միջանցքի արևմտյան երթուղու զարգացմանը։ «Արմենպրես»-ի հաղորդմամբ՝ այս մասին հայտնում է իրանական IRNA գործակալությունը։

Գործակալության փոխանցմամբ՝ համաձայնագիրը կնքվել է Անկախ Պետությունների Համագործակցության (ԱՊՀ) տրանսպորտային խորհրդի 83-րդ նիստի շրջանակներում, որը տեղի է ունեցել Բաքվում՝ 15 անդամ պետությունների պատվիրակությունների մասնակցությամբ։

Իրանի երկաթուղիների տվյալներով՝ երեք կողմերը հաստատել են երկարաժամկետ և շահավետ համագործակցության շրջանակ, որը կենտրոնացած է միջանցքի երկայնքով տարանցիկ հնարավորությունների ամրապնդման վրա։

Նշվում է, որ հիմնական նպատակներն են արևմտյան երթուղով բեռնափոխադրումների համար ֆիքսված գնագոյացում սահմանելը, մրցակցային միասնական սակագների սահմանումը և լոգիստիկ ծառայությունների ընդլայնումը։

Հուշագրի ստորագրմամբ երկաթուղու ղեկավարներն ընդգծել են իրենց հանձնառությունը երկկողմ և բազմակողմ համագործակցության շարունակականությանը։

Նախաձեռնությունը նպատակ ունի միջանցքի արևմտյան ճյուղը վերածել ակտիվ տարածաշրջանային տարանցիկ երթուղու՝ աջակցելով Իրանի, Ռուսաստանի, Ադրբեջանի և այլ մասնակից երկրների միջև ավելի լայն կապի ջանքերին։