Կին զինծառայողը մեղադրվում է հրամանատարին վիրավորելու համար

ՀՀ ՊՆ Ն զորամասի պայմանագրային զինծառայող, կին զինծառայող Հ.Ա.-ին մեղադրանք է առաջադրվել ՀՀ քրեական օրենսգրքի 524-րդ հոդվածի 2-րդ մասի 1-ին կետով՝ ստորադասի կողմից հրամանատարի նկատմամբ վիրավորանք հասցնելու համար։ Մեղադրյալը 2024 թվականի դեկտեմբերի 6-ին այլ զինծառայողների ներկայությամբ իր ուղղակի պետ փոխգնդապետ Ռ.Ս.-ի հասցեին հնչեցրել է վիրավորանք պարունակող արտահայտություն՝ նվաստացնելով վերջինիս պատիվն ու արժանապատվությունը։ Գործը դատարան է ուղարկվել 2025 թվականի մայիսի 8-ին։ Այս մասին տեղեկացնում է Iravaban.net–ը՝ Datalex դատական տեղեկատվական համակարգին հղումով։

Դեպքի հանգամանքները

2024 թվականի դեկտեմբերի 6-ին, ժամը 10:00-ի սահմաններում, ՀՀ ՊՆ Ն զորամասի Ն դիվիզիոնի հրամանատարական կետում այլ զինծառայողների ներկայությամբ Հ.Ա.-ն՝ հանդիսանալով նույն զորամասի պայմանագրային զինծառայող, Ն դիվիզիոնի պլանշետավար-ռադիոհեռախոսավար, կոչումով շարքային, իր ուղղակի պետ՝ Ն դիվիզիոնի հրամանատար, փոխգնդապետ Ռ.Ս.-ի հասցեին հնչեցրել է հետևյալ վիրավորանք պարունակող արտահայտությունը՝ «Կամանդիրն աչքիս ուզում է, որ վերևից իր հետույքին ձեռ տան՝ նոր հասկանա, թե ում հետ գործ ունի»։

Մեղադրանքը

Հ.Ա.-ին մեղադրանք է առաջադրվել ՀՀ քրեական օրենսգրքի 524-րդ հոդվածի 2-րդ մասի 1-ին կետով՝ զինծառայողին վիրավորանք հասցնելը, որը կատարվել է ստորադասի (ենթակայի) կողմից հրամանատարի (պետի) նկատմամբ։