Կիևը կարող է զրկվել ՆԱՏՕ-ին անդամակցելու հնարավորությունից․ CNN

ԱՄՆ-ն և Ուկրաինան բանակցությունների ընթացքում քննարկել են հակամարտության ավարտի հնարավոր սցենարը, որի դեպքում Կիևը կարող է փաստացի զրկվել Հյուսիսատլանտյան դաշինքին անդամակցելու հնարավորությունից: Այս մասին հայտնում է CNN News-ը՝ հղում անելով իր աղբյուրներին։

«Բանակցությունների մասնակիցները քննարկել են հնարավոր սցենարը, որի դեպքում Ուկրաինան փաստացի կհրաժարվի անդամակցել արևմտյան ռազմական դաշինքին այն պայմանավորվածությունների հիման վրա, որոնք պետք է ուղղակիորեն համաձայնեցվեն ՆԱՏՕ-ի անդամ պետությունների և Մոսկվայի միջև», - նշվում է նյութում:

Աղբյուրի խոսքով՝ Ուկրաինային «իրավաբանորեն չեն ստիպի» հրաժարվել ՆԱՏՕ-ի անդամ դառնալու ձգտումից: Սակայն եթե ԱՄՆ-ն ցանկանա ինչ-որ բանի շուրջ պայմանավորվել Ռուսաստանի հետ երկկողմ կարգով, կամ եթե Մոսկվան ցանկանա դաշինքից ստանալ որոշակի բազմակողմ երաշխիքներ, ապա «Կիևը չի ներգրավվի այդ գործընթացում»:

Միևնույն ժամանակ, զրուցակիցը նշել է, որ այս հարցի վերաբերյալ վերջնական որոշում դեռ չի կայացվել և «պետք է հաստատվի Ուկրաինայի կողմից»: