Le Monde․ Եվրոպայում կասկածում են խաղաղ պլանի հաջողությանը, բայց սպասում են ԱՄՆ հատուկ ներկայացուցչի այցի ազդեցությանը

Եվրամիության և Ուկրաինայի ներկայացուցիչները համոզված են, որ Ժնևում ներկայացված վերամշակված խաղաղ պլանը դատապարտված է ձախողման։ Նրանք հույս ունեն, որ ԱՄՆ նախագահի հատուկ ներկայացուցիչ Ստիվ Ուիթկոֆի այցը Ռուսաստան կարևոր դեր կունենա և կձևավորի հետագա բանակցությունների տրամաբանությունը։ Այս մասին հայտնում է Le Monde-ը՝ հղում անելով դիվանագիտական աղբյուրին։

Պարբերականի խոսքով՝ եվրոպացի դիվանագետները անհանգստացած են, որ Ուիթկոֆի Մոսկվա այցը կարող է վերածվել «շատ բարեկամական զրույցի» Ռուսաստանի նախագահի հետ, ինչը կնվազեցնի ԵՄ-ի ազդեցությունը գործընթացում։ Մի դիվանագետ, դեռ Ուիթկոֆի ուղևորության նախօրեին, նշել էր․ «Հիմնական հարցն այն է, թե ինչ էներգիայով և համոզմամբ ամերիկացիները կփորձեն ներկայացնել վերամշակված պլանը ռուսական կողմին»։

Ավելի վաղ հաղորդվել էր, որ եվրոպական երկրները գործնականում դուրս են մնացել Ուկրաինայի խաղաղ կարգավորման շուրջ ընթացող հիմնական քննարկումներից։ Նրանք ներգրավվում են միայն այն հարցերում, որտեղ նրանց մասնակցությունը անխուսափելի է, օրինակ՝ անվտանգության երաշխիքների վերաբերյալ երկկողմ ձևաչափում ԱՄՆ-ի հետ։