Դուք բարձրաստիճան զինվորական եք, ձեր խոսքը առավել քան, դատարանի գնահատմամբ, ծանրակշիռ է. դատավորը՝ Խաչատուրովին

Հակակոռուպցիոն դատարանում դատավոր Սարգիս Պետրոսյանի նախագահությամբ կայացավ ՀՀ երկորրդ նախագահ Ռոբերտ Քոչարյանի ու նախկին այլ պաշտոնյաների գործով դատական նիստը։

Դատավորը, դիմելով գործով  անցնող Յուրի Խաչատուրովին, նշել է , որ մի քանի հարցադրում ունի.

«Դուք բարձրաստիճան զինվորական եք, ձեր խոսքը  առավել քան, դատարանի  գնահատմամբ, ծանրակշիռ է։

Դուք 2018 թվականին մեղադրական եզրակացությունը ստացել եք ռուսերեն թարգմանությամբ»։

Փաստաբան Միհրան Պողոսյանն ասաց, որ ռուսերեն թարգմանությամբ մեղադրական եզրակացություն չեն ստացել։ Նա նշեց, որ իրենք ամեն անգամ այդ հարցը բարձրաձայնում էին, երկու անգամ էլ գրավոր միջնորդություն են ներկայացրել։

Դատավորն ասաց, որ եթե քրեական գործից որոշակի փաստաթղթեր կան, որոնց ռուսերեն թարգմանությունը Յուրի Խաչատուրովը ցանկանում է ունենալ, այդ մասին ավելի վաղ հայտնել։ 

«Եթե յուրաքանչյուր հետազոտվող փաստաթղթի ժամանակ դուք խնդրեք դատարանից թարգմանած տարբերակով տրամադրի, կունենանք ընդամենը մեկ նիստ, հետո մեկ-երկու ամիս հետաձգում, որպեսզի թարգմանվի։ Դա ողջամիտ չէ։ Եթե դուք նման ցանկություն ունեք, որպեսզի ձեզ փոխանցվի ռուսերեն թարգմանությամբ՝ ծանոթանալու, դիրքորոշում հայտնելու համար, այդ մասին հայտնեք»,- ասաց դատավորը։ 

Յ.Խաչատուրովը դիմելով դատավորին՝ ասաց. «Տեսնում եմ ձեզ մոտ մեծ խնդիրներ կան ինձ համար ռուսերեն թարգմանելու համար։ Որպեսզի ձեր աշխատանքը թեթևացնեմ,  հատկապես որ տուժողները նույնպես դեմ չեն, գիտեմ, որ դուք էլ, ներսում նստած է այն հանգամանքը, որ ես որևէ բանում մեղավոր չեմ, ձեր քարտուղարն առավել ևս, բացի դատախազից, իհարկե, ինձ ազատեք բոլոր գործերից և զբաղվեք ձեր գործերով»։ 

Դատավորն ասաց, որ համապատասխանում փուլում, եթե Յ.Խաչատուրովին մեղսագրվող արարքը չհաստատվի, դատարանը կկայացնի արդարացման վերդիկտ, եթե հիմնավորի՝ կկայացնի մեղադրական վերդիկտ։ Հիմա այդ փուլում չենք գտնվում»։

«Ուրեմն ամբողջը հերթով թարգմանեք։

Եթե դուք այսքան տարի մեր նյարդային համակարգի հետ խաղում եք, ինչո՞ւ ես չեմ կարող։ Թարգմանեք, հետո կխոսենք։

Եթե դուք ինչ-որ տեղ դասավանդում եք, ես ձեր ուսանողը չեմ, որ դուք ինձ հարց տաք, ես ձեզ պատասխանեմ,»,- ասաց Խաչատուրովը։

Դատավորն էլ նշեց, որ ինքը գործը քննող դատավորն է, դատարանում պարտավոր են  դրսևորել պատշաճ վարքագիծ։

«Ցանկանո՞ւմ եք ծանոթանալ նոր մեղադրանքի թարգմանված տարբերակին»,- հարցրեց դատավորը։ 

«Այո, ցանկանում եմ»,- պատասխանեց Խաչատուրովը։ 

Ռ.Քոչարյանի  պաշտպանները մեղադրանքի հետ կապված գրավոր տարբերակով առարկություններ ներկայացրեցին։

Դատական հաջորդ նիստը կկայանա դեկտեմբերի 17-ին։

Հիշեցնենք, որ ՀՀ երկրորդ նախագահ Ռոբերտ Քոչարյանը, ԶՈւ գլխավոր շտաբի նախկին պետ, ՀԱՊԿ նախկին գլխավոր քարտուղար Յուրի Խաչատուրովը և ՀՀ պաշտպանության նախկին նախարար Սեյրան Օհանյանը մեղադրվում էին սահմանադրական կարգը տապալելու մեջ։  Մինչ ընդհանուր իրավասության դատարանը քննում էր գործը, ՍԴ-ն հակասահմանադրական ճանաչեց Քրեական օրենսգրքի այդ հոդվածը։

Վճռաբեկ դատարանը 2024-ի սեպտեմբերին բեկանել է Ռոբերտ Քոչարյանի, Յուրի Խաչատուրովի և մյուսների գործը կարճելու որոշումը և թույլատրել վերաորակավորել մեղադրանքը: