Արեգակի վրա տեղի է ունեցել 2025 թվականի հինգերորդ ամենահզոր բռնկումը

Դեկտեմբերի 1-ի առավոտյան Արեգակի վրա տեղի է ունեցել 2025 թվականի ամենահզոր արեգակնային բռնկումներից մեկը։ Այս մասին հաղորդում է «Ֆոբոս» օդերևութաբանական կենտրոնի առաջատար մասնագետ Միխայիլ Լեուսը։

Նրա խոսքով՝ այն դասակարգվել է որպես բարձր դասի ռենտգենյան բռնկում և հասել է X1,95 մեծության՝ գագաթնակետին հասնելով Երևանի ժամանակով 06:49-ին։

Օդերևութաբանը նշել է, որ ուժի առումով՝ բռնկումը տարվա սկզբից ի վեր հինգ ամենանշանակալի արեգակնային իրադարձություններից մեկն է։ Ավելին, դրա գտնվելու վայրը հեռու է Արեգակ-Երկիր գծից, ինչը արեգակնային նյութի՝ մոլորակին հարվածելու հավանականությունը դարձնում է չափազանց ցածր։

Արեգակնային բռնկումը Արեգակի վրա պայթյուն է, որը տեղի է ունենում, երբ ոլորված մագնիսական դաշտերի էներգիան դուրս է մղվում դեպի դուրս։ Այն առաջացնում է ճառագայթման հոսք էլեկտրամագնիսական սպեկտրի բոլոր տիրույթներում՝ ռադիոալիքներից մինչև ռենտգենյան և գամմա ճառագայթներ։ Ռենտգենյան ճառագայթման ինտենսիվությունից կախված՝ արեգակնային բռնկումները կարող են դասակարգվել որպես A, B, C, M կամ X դասի։ Նման պայթյունները մեծ են և կարող են առաջացնել ռադիոխանգարումներ ամբողջ մոլորակի վրա և երկարատև մագնիսական փոթորիկներ։