Մակրոնը Ֆրանսիայում ծաղրի առարկա է դարձել Պուտինի հայտարարությունից հետո

Ֆրանսիական «Հայրենասերներ» կուսակցության առաջնորդ Ֆլորիան Ֆիլիպոն X սոցիալական ցանցում ծաղրել է նախագահ Էմանուել Մակրոնին՝ Վլադիմիր Պուտինի կողմից Եվրոպային ուղղված Ռուսաստանի ենթադրյալ սպառնալիքներին արձագանքից հետո։

«Կարծում եմ՝ Մակրոնի ականջները շատ բարձր են զնգում», - գրել է Ֆիլիպոն՝ Ռուսաստանի նախագահի ելույթը կցելով գրառմանը։

Բիշքեկում կայացած մամուլի ասուլիսում Վլադիմիր Պուտինը հայտարարել է, որ Ռուսաստանը պատրաստ է «ամեն դեպքում» հաստատել իր դիրքորոշումը, որ մտադիր չէ հարձակվել եվրոպական երկրների վրա։

Պուտինը նաև «խաբեբաներ» է անվանել Եվրոպայի վրա Ռուսաստանի հարձակման ռիսկի մասին տեղեկատվություն տարածողներին։ Պետության ղեկավարի խոսքով՝ Ռուսաստանը պատրաստ է Արևմուտքի հետ քննարկել եվրոպական անվտանգության և ռազմավարական կայունության հարցերը։