Մեր հավատարմությունը Վեհափառին անշեղ է, որոշ հոգևորականներ շեղվել են իրենց ուխտից. Տեր Առաքել Ամիրյան (տեսանյութ)
Քաղաքական«Մեր հավատարմությունը Վեհափառ Հայրապետին անշեղ է, մեր առաքելության աղբյուրը Մայր Աթոռն է, և մենք շարունակելու ենք հորդորել ու աղոթել, որպեսզի շեղված հոգևորականները վերադառնան իրենց կոչմանը և աջակցեն Եկեղեցուն»,– Euromedia24-ի հետ զրույցում նշեց Ռուսաստանի և Նոր Նախիջևանի հայոց թեմի Յարոսլավի մարզի հոգևորական Տեր Առաքել քահանա Ամիրյանը։
Նրա խոսքով՝ թեմի քահանաները միակամ իրենց հավատարմությունն ու աջակցությունն են հայտնում Ամենայն Հայոց Հայրապետին՝ որդիական խոնարհությամբ։ Միաժամանակ, Տեր Առաքելը նշեց, որ որոշ հոգևորականներ շեղվում են իրենց կոչումից և համագործակցում իշխանությունների հետ, որոնց նպատակն է Հայ Եկեղեցու մասնատումն ու թուլացումը․ դա, ըստ նրա, չի կարող ներկայացնել Եկեղեցու ձայնը։ Տեր Առաքելը անդրադարձավ կալանավորված Միքայել, Բագրատ և Մկրտիչ սրբազանների՝ Վեհափառին ուղղված պահանջին, ըստ որի անհրաժեշտ է դադարեցնել Փաշինյանին միացած թեմակալ առաջնորդների լիազորությունները և նոր նշանակումներ կատարել թեմերում՝ կանխելու քահանաների վրա հնարավոր ճնշումները։
Նրա խոսքով՝ նրանք, թեև անազատության մեջ, շարունակում են մասնակցել Եկեղեցու կանոնական կյանքին և իրավունք ունեն արտահայտելու իրենց դիրքորոշումը։ Տեր Առաքելը վստահ է, որ առաջիկա եպիսկոպոսների ժողովը կտա լիարժեք գնահատական և կընդունի համապատասխան որոշումներ։
«Կալանավորված մեր բարձրաստիճան հայրերը դիմել են Վեհափառին՝ խաղաղություն հաստատելու և շեղումներ կանխելու նպատակով՝ առաջարկելով համապատասխան քայլեր, ինչպես թեմակալ առաջնորդների գործունեության ժամանակավոր կասեցումը և եպիսկոպոսների ժողովի հրավիրման անհրաժեշտությունը»,– ասաց Տեր Առաքելը՝ ընդգծելով, որ ամբողջությամբ կիսում է նրանց մոտեցումները։
Տեր Առաքելը նշեց, որ Ռուսաստանի թեմից միակ հոգևորականը, ով չի միացել Եկեղեցուն աջակցող հայտարարությանը, Տեր Հակոբ քահանա Սարոյանն է, Գևորգ եպիսկոպոս Սարոյանի եղբայրը․ Տեր Հակոբը, ով թաքցրել է իր քաղաքական դիրքորոշումը և այժմ բացահայտ կանգնել է իշխանության կողմում։ Տեր Առաքելը ընդգծեց, որ անձնական երկարամյա փորձառության և համագործակցության պատճառներով չի ցանկանում գնահատական տալ նրա ներկայիս քայլերին։ Տեր Առաքելը ցավով է նշում, որ որոշ բարձրաստիճան հոգևորականներ շեղվել են իրենց ուխտից։ Նրա խոսքով՝ հոգևորականի գլխավոր պարտականությունն է մնալ հավատամքին և Վեհափառ Հայրապետին հավատարիմ։
«Մեր հավատարմությունը Վեհափառ Հայրապետին անշեղ է, և մենք շարունակելու ենք աղոթել, որպեսզի շեղվածները վերադառնան իրենց կոչմանը»,– եզրափակեց Տեր Առաքել Ամիրյանը։
ՈՒՂԻՂ ԵԹԵՐ
Ամենադիտված 
Մահացել է երգիչ Հովհաննես Գրիգորյանը
