Ֆոն դեր Լայենը ցանկանում է արգելել դատարաններին վերադարձնել Ռուսաստանի ակտիվները

Եվրահանձնաժողովի ղեկավարը՝ Ուրսուլա ֆոն դեր Լայենը, հայտարարել է, որ ԵՄ-ը մտադիր է արգելել Եվրոպայի դատարաններին իրականացնել այնպիսի որոշումներ, որոնք կարող են պահանջել Ռուսաստանի ակտիվների վերադարձ, եթե դրանք բռնագրավվեն Ուկրաինային նախատեսվող «ռեպարացիոն վարկի» շրջանակում։ Ինչպես փոխանցում է РИА Новости-ն, արգելքը նախատեսվում է որպես իրավական պաշտպանական մեխանիզմ՝ բացառելու Ռուսասատանի իրավական հետպահանջները։

Ֆոն դեր Լայենի խոսքով՝ Եվրահանձնաժողովը ցանկանում է ապահովել, որ ռուսական սառեցված ակտիվներով Ուկրաինային ֆինանսական աջակցություն տրամադրելու հնարավորությունը չխաթարվի դատարանների որոշումների պատճառով։ Նրա տրամաբանությամբ՝ եթե կոնֆիսկացիան հաստատվի ԵՄ մակարդակում, ապա անդամ երկրներում պետք է բացառվի այդ միջոցների վերադարձի ցանկացած դատական ճանապարհ։

Այս նախաձեռնությունը դիտարկվում է ռուսական պետական ակտիվների օգտագործման շուրջ ԵՄ-ի ձևավորած փաթեթի մաս։ Մինչդեռ մի շարք երկրներ, այդ թվում Բելգիան, նախկինում արդեն հայտնել են, որ պատրաստ չեն գնալ Ռուսաստանի ակտիվների լիակատար բռնագրավման ճանապարհով։