«Չեմ ուզում՝ գամ, իմ ժամանակն այստեղ ծախսեմ»․ ինչու է Խաչատուր Սուքիասյանը որոշել չմասնակցել ԱԺ ընտրություններին

«Ես այն ժամանակ ասել եմ, որ ձեր կողքը կանգնած եմ, ինչով պետք է՝ կաջակցեմ, հիմա էլ նույն կարծիքին եմ, եթե դրա կարիքը զգացի։ Ուզում եմ, որ Հայաստանի Հանրապետությունը խաղաղ լինի, զարգանա, սա է, բայց չեմ ուզում՝ գամ, իմ ժամանակն այստեղ ծախսեմ։ Ամեն ինչ հիմա շատ ավելի հասկանալի է, 2021 թվականին ավելի բարդ էր ժամանակները»։ Այս մասին լրագրողների հետ զրույցում ասել է «Քաղաքացիական պայմանագրի» նախընտրական ցուցակում չընդգրկված Խաչատուր Սուքիասյանը՝ նշելով, որ որոշել է ստեղծագործական աշխատանքով զբաղվել, հնարավոր է՝ դասախոսությամբ։

Նա նշել է, որ իր որոշումը Նիկոլ Փաշինյանի հետ չի քննարկել, քանի որ դրա կարիքը չի զգացել․ «Երբ, ինչ պետք լինի՝ ես կանգնած եմ «Քաղաքացիական պայմանագիր» կուսակցության կողքին, որովհետև ճիշտ ճանապարհի վրա է Հայաստանը»։ 

Սուքիասյանը նաև հայտնել է, որ վաղուց է ասել՝ չի առաջադրվելու, չի ցանկանում ավելորդ ուշադրության կենտրոնում լինել․ «Բայց ես Նիկոլ Փաշինյանի հետ եմ, Նիկոլ Փաշինյանի գործողությունը ես գնահատում եմ բարձր, իր տանջանքը, իր չարչարանքը, իր պատասխանատվության աստիճանը ․․․ այդ խնդիրը չունենք, բայց չեմ ուզում գալ Ազգային ժողով»,– ասել է պատգամավորը։