Ադրբեջանում տեսանյութի պատճառով 4 տարվա ազատազրկում է սպառնում զբոսաշրջիկներին

Ադրբեջանում պետական ​​մեղադրողը պահանջել է չորս տարվա ազատազրկման դատապարտել Սաուդյան Արաբիայի քաղաքացիներ Ալզաման Մահդի Ալիին, Ալղաբր Մոհամմադ Հուսեյնին և Ալղաբր Մահդի Մոհամմադին, որոնք Բաքվի «շեհիդների ծառուղում» նկարահանել և սոցիալական ցանցերում հրապարակել են «վիրավորական բնույթի» տեսանյութեր։

Ադրբեջանական ԶԼՄ–ների հաղորդմամբ՝ հաջորդ դատական ​​նիստը նշանակված է դեկտեմբերի 16-ին։

Նշվում է, որ դեպքը տեղի է ունեցել այս տարվա օգոստոսին։ Երեք օտարերկրյա քաղաքացիներ, որոնք Ադրբեջան էին ժամանել որպես զբոսաշրջիկներ, վիրավորական բնույթի տեսանյութեր են նկարահանել «շեհիդների ծառուղում»  և տեղադրել դրանք սոցիալական ցանցերում։

Քրեական գործ է հարուցվել Ադրբեջանի քրեական օրենսգրքի 245-րդ հոդվածի (գերեզմանի պղծում) համաձայն։ Ադրբեջանի ոստիկանության աշխատակիցները պարզել են հանցագործների ինքնությունը, բերման ենթարկել և ձերբակալել։ Օգոստոսի 18-ին Սաբայիլի շրջանային դատարանը օտարերկրացիներին դատապարտել է երեք ամսվա նախնական կալանքի։