Եվրոպայում գենային մուտացիա ունեցող տղամարդը 197 երեխայի հայր է դարձել

Բրիտանական «Դեյլի Մեյլ» թերթի փոխանցմամբ՝ սերմնահեղուկի դանիացի դոնորը, որը քաղցկեղի ռիսկը մեծացնող գենային մուտացիա ունի, Եվրոպայում առնվազն 197 երեխայի հայր է դարձել։

Քյելդ կեղծանունով դանիացի ուսանողը 2005 թվականին դարձել է Եվրոպական սերմնաբաշխման բանկի դոնոր։ Այդ ժամանակ ո՛չ նա, ո՛չ էլ բանկը չգիտեին, որ դոնորն ունի TP53 մուտացիա, որը մեծացնում է մահացու հիվանդության ռիսկը։ Քյելդն ինքը առողջ է, բայց այս մուտացիայի փոխանցումը մեծացնում է լեյկեմիայի, ուղեղի ուռուցքների և ոսկրերի քաղցկեղի ռիսկը։

Տղամարդու սերմնահեղուկը 2006-ից 2022 թվականներին օգտագործվել է 14 երկրների 67 կլինիկաներում։ Հայտնի է, որ Քյելդից ծնված երեխաները լույս աշխարհ են եկել Դանիայում, Իսպանիայում, Բելգիայում, Գերմանիայում և Իսլանդիայում։ Սերմնահեղուկը նաև ուղարկվել է Լեհաստան, Ալբանիա, Իռլանդիա, Սերբիա և Կոսովո, բայց այնտեղ հղիություններ չեն գրանցվել։ Գենետիկ արատը հայտնաբերվել է միայն 2023 թվականին, որից հետո նրա սերմի օգտագործումը դադարեցվել է։

Լրատվամիջոցների հաղորդագրությունների համաձայն՝ որոշ երեխաներ ժառանգել են մուտացիան և նրանց մոտ քաղցկեղ է զարգացել, գրանցվել են նաև մահվան դեպքեր։