Գերմանիայի դեսպանատանն այլևս հերթեր չեն լինի․ Փաշինյանը «կարևոր նորություն» է հայտնել

Շատ կարևոր նորություն իմացանք երեկ Բեռլինում, երբ որ Հայաստանի Հանրապետությունում Գերմանիայի դեսպանը ասաց, որ մյուս տարվանից՝ հունվարից կամ գուցե փետրվարից, Գերմանիայի դեսպանատանն այլևս հերթեր չեն լինի: Ընդ որում, մենք արդեն բավական երկար ժամանակ աշխատում ենք Եվրամիության մեր գործընկերների հետ՝ ասելով, որ մարդիկ մեզ չեն հասկանում, որովհետև ասում են՝ լուրերով նայում ենք, որ Եվրամիության հետ հարաբերությունները կարգավորվել են, իսկ միայն վիզա ստանալու, դիմում հանձնելու համար մարդիկ 10 ամիս ստիպված են սպասել: Այս մասին Գերմանիայում լրագրողների հետ զրույցում ասել է վարչապետ Նիկոլ Փաշինյանը։

«Եվ հիմա առաջին արձագանքը Հայաստանի Հանրապետությունում Գերմանիայի դեսպանի կողմից էր, ով ամենաբարձր մակարդակով պաշտոնապես հայտարարեց, որ մյուս տարվա սկզբից այլևս հերթ ընդհանրապես գոյություն չի ունենալու․ տալիս են վիզա, ում տալիս են՝ կտան, ում չեն տալիս՝ չեն տա և հիմա շղթայական հույս ունեմ, որ սա կշարունակվի նաև մյուս դեսպանատների դեպքում և մենք այս խնդրից կազատվենք»,– նշել է Փաշինյանը։

Նրա խոսքով՝ 2018 թվականի համեմատ դեպի ԵՄ ուղևորությունները մոտավորապես 400- 500%-ով աճել են։ Ըստ Փաշինյանի՝ դա խոսում է տնտեսական, բարեկեցության մակարդակի աճի մասին․ «Բա ո՞նց է մարդը ձեռները ծափ տալով, ծակ կոշիկով, սոված–ծարավ, կարկատած բանով Գիքորի նման գնում Հռոմ կամ Բեռլին»,– ասել է նա։