Գործարարներին կոչ եմ անում գալ և քաղաքականությանը «աբգոն անել». Նիկոլ Փաշինյան

Հայ-թուրքական սահման գոյություն չունի, կա Հայաստան-Թուրքիա սահման, լրագրողների հետ զրույցում ասել է վարչապետ Նիկոլ Փաշինյանը։

Նա նշել է, թե Հայաստան-Թուրքիա հարաբերությունների կարգավորումը և սահմանի բացումը հիմա բոլորովին ուրիշ համատեքստ է ստացել, որովհետև, նրա խոսքով, նաև «Խաղաղության խաչմերուկի» և «TRIPP» նախագծի շրջանակներում հիմա Հայաստան-Թուրքիա սահմանի բացումը նշանակում է Կենտրոնական Ասիայից Եվրամիություն երկաթուղային կապի հաստատում, ավտոտրանսպորտային կապի հաստատում, նոր խողովակաշարերի հնարավորություն, նոր էլեկտրահաղորդման գծերի շարունակության հնարավորություն։

«Մենք խոսում ենք կանաչ ջրածնի մասին։ Նախագծեր են լինում, որ մտածում ես՝ լավ, դա ինչքանո՞վ է իրատեսական։ Այսօր ինձ համար ակնհայտ է, որ Կենտրոնական Ասիայից Եվրոպա ապագայում մի իքս պահի անպայման կանաչ ջրածնի խողովակաշար է գալու։ Հիմա Հայաստան-Թուրքիա հարաբերությունների կարգավորումը և սահմանի բացումը նշանակում է՝ այդ պոտենցիալ խողովակաշարը ևս մեկ լրացուցիչ երթուղու հնարավորություն ստանա, որը ձեռնտու է և՛ մեր տարածաշրջանի երկրներին, և՛ Եվրամիության երկրներին»,- ընդգծել է Նիկոլ Փաշինյանը։

Նա հասկացել է, որ տնտեսությունը քաղաքական գործիչներին վազանցում է։

«Ես զգում եմ, որ տնտեսությունը քաղաքականությանը վազանցում է, և դա շատ լավ նորություն է, որովհետև տնտեսական կապերը և տնտեսական հետաքրքրությունները, որոնք Հայաստան-Ադրբեջան հարաբերություններում և ավելի լայն համատեքստում ձևավորվում են, կայունության և անվտանգության ամենահուսալի երաշխիքն են, որովհետև, երբ որ տարածաշրջանի բիզնեսները սկսեն իրար հետ փող աշխատել և ամեն մեկը իր երկրներին բերի լրացուցիչ եկամուտներ, այդ ժամանակ երկրներից ոչ մեկը մյուս երկրի ապակայունացման և, ընդհանրապես, տարածաշրջանի ապակայունացման նկատմամբ հետաքրքրություն չի ունենա, ընդհակառակը, շատ մեծ հետաքրքրություն կցուցաբերի երկրների և տարածաշրջանի կայունության համար»,- նշել է Նիկոլ Փաշինյանը։

Նա գործարարներին կոչ արեց գալ և քաղաքականությանը «աբգոն անել»։

«Դա շատ կառուցողական աբգոն է։ Սովորաբար, «աբգոնը» վտանգավոր է լինում, այս դեպքում ամենահուսալի և լավ «աբգոնն» է, որ տարածաշրջանային տնտեսությունը գա տարածաշրջանային քաղաքականությանն «աբգոն անի»։ Այն ժամանակ մտածում էինք, որ տնտեսությունը կհրի քաղաքականությանը, հիմա տնտեսությունը կքաշի քաղաքականությանը, որն ավելի էֆեկտիվ է», - հավելել է Նիկոլ Փաշինյանը։