Անգլալեզու ինչ-որ փաստաթուղթ է. Բագրատ Սրբազանի փաստաբանը` ՔԿ ղեկավարի հայտարարության մասին

Բագրատ արքեպիսկոպոս Գալստանյանի փաստաբան Տաթևիկ Սողոյանը Երևանի ընդհանուր իրավասության դատարանի Շենգավիթի նստավայրի մոտ լրագրողների հետ զրույցում պարզաբանեց, թե ինչ թղթերի մասին է խոսել ՀՀ քննչական կոմիտեի ղեկավար Արթուր Պողոսյանը, երբ հրապարակայնորեն մեղադրում էր Սրբազանին։

«Անգլալեզու ինչ-որ փաստաթուղթ է, որը Բագրատ սրբազանի կեցավայրի խուզարկությամբ հայտնաբերվել է նամակների տրցակից։ Բացատրեմ, որ հանրությանն էլ պարզ լինի. 2024 թվականին շարժման ժամանակ, երբ Կիրանցից Երևան էին գալիս, հարյուրավոր մարդիկ մոտենում էին ու սրբազանին կամ նրա աջակիցներին թղթեր փոխանցում, մարդիկ, ելնելով քաղաքավարությունից, վերցնում էին։ Այսինքն՝ ամեն մեկը ՀՀ փրկության իր պլանն էր ներկայացնում, և այդ թղթերից ինչ-որ տեղ մնացել է։ Բայց ԱԺ-ում Քննչական կոմիտեի ղեկավարն ասում է, որ սրբազանի ձեռքով է գրված, ինչն անհեթեթություն է։ Անգամ իր քննիչներն այդ ամենը չեն դրել մեղադրանքի եզրակացության հիմքում»,– ասաց նա։

Նշենք, որ այսօր դատական նիստը հետաձգվեց, քանի որ ներկա չէր փաստաբաններից Ալեքսանդր Կոչուբաևը։ «Սրբազան պայքարի» գործով հաջորդ դատական նիստը կկայանա դեկտեմբերի 18–ին՝ ժամը 15:30-ին։