ԱՄՆ-ում թոշակառուն հրկիզել է իր 83-ամյա հարևանուհու տունը, ապա փորձել փրկել նրան

Ամերիկացի տղամարդը, որը ենթադրաբար փորձել է փրկել տարեց հարևանուհուն հրդեհից, մեղադրվում է նրա տունը հրկիզելու մեջ։

Նյու Ջերսիում 83-ամյա Վիրջինիա Քրանվելի տանը հրդեհ է բռնկվել հուլիսի 25-ին։ Նրա հարևանը՝ 70-ամյա Ուիլյամ Ահլը, զանգահարել է 911՝ կնոջ տան երկրորդ հարկում հրդեհի մասին ահազանգելու համար։

Թոշակառուն հայտնել է, որ մոտ ժամը 1:30-ին զբոսանքի է դուրս եկել իր շան հետ, երբ նկատել է հրդեհը և վազել է Քրանվելի բաց ավտոտնակ՝ փորձելով փրկել նրան, բայց կրակը հետ է շպրտել իրեն։ Նա ծանր այրվածքներ է ստացել և հոսպիտալացվել։

Հրշեջները մարել են հրդեհը 20 րոպեի ընթացքում, բայց Վիրջինիային գտել են իր ննջասենյակում՝ անգիտակից վիճակում։ Շտապօգնության բժիշկները չեն կարողացել փրկել նրան։ Հետաքննությունը պարզել է, որ հավանաբար եղել է դիտավորյալ հրկիզում։

Հինգ ամիս անց Ահլը դարձել է գլխավոր կասկածյալը։ Նրան մեղադրանք է առաջադրվել ծանր հանցագործությունների, այդ թվում՝ հրկիզման և կողոպուտի համար։ Տղամարդու հարևանները ցնցված են մեղադրանքներից, քանի որ նրան հերոս էին համարում։ Նա այժմ կալանքի տակ է և սպասում է դատավարությանը։