Եվրախորհրդարանի անդամը ԵՄ-ն անվանել է «Ուկրաինայում խաղաղության հասնելու խոչընդոտ»

Եվրամիությունը Ուկրաինայի խաղաղության համաձայնագրի խնդրի մի մասն է, այլ ոչ թե լուծումը։ Բոլոր առաջարկները մերժվում են եվրոպացիների կողմից՝ առանց որևէ այլընտրանքի։ Այս մասին ՌԻԱ Նովոստիին ասել է բելգիացի եվրապատգամավոր Ռուդի Քվենսը։

Նա նշել է, որ ԵՄ-ն հայտարարում է բանակցությունների սեղանի շուրջ նստելու իր ցանկության մասին, բայց միևնույն ժամանակ հրաժարվում է Ռուսաստանի հետ երկխոսության ցանկացած հնարավորությունից։

«Ցանկացած նախաձեռնություն կամ առաջարկ՝ լինի դա Ռուսաստանից, թե ԱՄՆ-ից, մերժվում է՝ առանց որևէ այլընտրանք առաջարկելու։ Այս պահին ես ԵՄ-ն տեսնում եմ որպես խնդրի մի մաս, այլ ոչ թե խաղաղության համաձայնագրի լուծում», - ասել է եվրապատգամավորը։

Քվենսը կարծում է, որ ԵՄ-ի կողմից Մոսկվայի հետ երկխոսությունից հրաժարվելը նպատակ ունի միայն երկարաձգել պատերազմը՝ «դրա բոլոր հետևանքներով»։