Շվեդիայում փոթորիկը քշել է լեգենդար Սուրբծննդյան ծղոտե այծին

Շվեդական Եվլե քաղաքում տեղադրված հայտնի ծղոտե Սուրբծննդյան այծը կրկին չի հասել Նոր տարուն։ Ինչպես հայտնում է Metro-ն, այս անգամ այն ոչ թե վանդալների կամ հրդեհի, այլ ուժգին փոթորկի պատճառով է ավերվել։

Դեկտեմբերի 27-ին Շվեդիայում մոլեգնել է «Յոհաննես» անվանումով փոթորիկը։ Քամու ուժգին պոռթկումները, որոնց արագությունը Եվլեում մոտեցել է վայրկյանում 18 մետրի, քշել են 13 մետր բարձրությամբ ծղոտե այծը՝ այն գետնին տապալելով։ Տարիներ շարունակ տարբեր միջոցներով պաշտպանվող խորհրդանիշը այս անգամ չի դիմացել եղանակային պայմաններին։

Ծղոտե այծը Եվլեում կառուցվում է ամեն տարի՝ Սուրբ Ծնունդից մի քանի շաբաթ առաջ։ 59 տարվա պատմության ընթացքում այն ամբողջությամբ կանգուն է մնացել ընդամենը 19 անգամ։ Մնացած տարիներին այն կամ այրվել է, կամ վնասվել ու ոչնչացվել տարբեր միջադեպերի հետևանքով՝ դառնալով քաղաքի ամենահայտնի և «անհաջող» տոնական խորհրդանիշներից մեկը։