2025-ում թողնում ենք կատարված մեծ աշխատանք. ՏԿԵ նախարարի ուղերձը

Տարածքային կառավարման և ենթակառուցվածքների նախարար Դավիթ Խուդաթյանը Ամանորի և Սուրբ Ծննդյան տոների կապակցությամբ շնորհավորական ուղերձ է հղել՝ ամփոփելով 2025 թվականին իրականացված խոշոր ծրագրերը ճանապարհաշինության, ավիացիայի, էներգետիկայի և համայնքային զարգացման ոլորտներում ու ներկայացնելով 2026 թվականի առաջնահերթությունները։

«Ամանորի և Սուրբ Ծննդյան նախաշեմին ցանկանում եմ ջերմորեն շնորհավորել ձեզ՝ մաղթելով խաղաղություն և առողջություն։ Անցնող տարին զերծ չէր մարտահրավերներից և խնդիրներից, բայց աշխատանքի ու ներդրած ջանքերի արդյունքում 2025-ում թողնում ենք կատարված մեծ աշխատանք։ 2025 թվականին մենք հսկայական առաջընթաց ունեցանք «Հյուսիս-հարավ» ծրագրում։

Աշտարակ-Գյումրի հատվածն ամբողջությամբ պատրաստ է երթևեկության համար, հարավային հատվածում առաջանցիկ տեմպերով ահռելի աշխատանք է տարվում։ ՀՀ Կառավարության վարած քաղաքականության արդյունքում Wizz Air ավիաընկերությունը պաշտոնապես բազավորվեց «Զվարթնոց» օդանավակայանում և սկսեց դեպի Եվրոպա թռիչքներ իրականացնել Գյումրիի «Շիրակ» օդանավակայանից։ Մեր քաղաքացիները հնարավորություն ստացան թռչել 8 նոր ուղղություններով դեպի Եվրոպա։

Սկսել է զգալի տեմպերով առաջ գնալ Միասնական երթուղային ցանցի ծրագիրը։ Հաջողվեց վերականգնվող էներգետիկայի ծավալների աննախադեպ աճի պայմաններում ապահովել ՀՀ էներգետիկ համակարգի կայունությունը և շարունակել էլեկտրաէներգիայի արտահանումը Իրան և Վրաստան։

2025 թվականին շահագործման հանձնվեց ևս 505 կմ նորակառույց ճանապարհ, իսկ պետական համաֆինանսավորման ծրագիրը համաֆինանսավորվեց աննախադեպ՝ 33.6 միլիարդ դրամով։ Անցնող տարվա կարևոր իրադարձություններից մեկը Վեդիի ջրամբարի շինարարական աշխատանքների ավարտն էր, որը ռազմավարական նշանակություն ունի ջրային ռեսուրսների արդյունավետ կառավարման համար։

Տարածքային կառավարման և ենթակառուցվածքների ոլորտում մենք շարունակել ենք իրականացնել ծրագրեր, որոնք միտված են համայնքների համաչափ զարգացմանը և քաղաքացիների կյանքի որակի բարձրացմանը։ Թող 2026 թվականը լինի խաղաղության ամրապնդման, առաջընթացի, նոր հնարավորությունների և ձեռքբերումների տարի։

Շնորհավոր Ամանոր և Սուրբ Ծնունդ»։