Գալիք տարին պետք է վերածվի բնության պահպանության իրական քայլերի. շրջակա միջավայրի նախարար

Շրջակա միջավայրի նախարար Համբարձում Մաթևոսյանը Նոր տարվա և Սուրբ Ծննդյան տոների կապակցությամբ ուղերձ է հղել քաղաքացիներին՝ ընդգծելով բնության պահպանության, կայունության և միջազգային պատասխանատվության կարևորությունը, ինչպես նաև Հայաստանում COP17 համաժողովի ընդունելության նշանակությունը։

Շրջակա միջավայրի նախարար Համբարձում Մաթևոսյանը Նոր տարվա առթիվ ուղերձում նշել է.

«Տարվա ավարտը այն պահն է, երբ գնահատում ենք անցած ճանապարհը և նոր պատասխանատվությամբ ենք դիմավորում գալիք տարին։ Շրջակա միջավայրը մեր պետականության ու կյանքի որակի հիմնասյուներից է. այն ազդում է առողջության, տնտեսական կայունության, համայնքների անվտանգության և ապագայի հանդեպ վստահության վրա։

Այս օրերին, երբ մենք միմյանց մաղթում ենք խաղաղություն, կարևոր եմ համարում ընդգծել՝ խաղաղությունն անբաժանելի է կայունությունից, իսկ կայունությունը անբաժանելի է շրջակա միջավայրի պաշտպանությունից։ Մաքուր ջուրն ու օդը, բերրի հողը, պահպանված անտառներն ու կենսաբազմազանությունը ոչ միայն բնապահպանական, այլև հասարակական համերաշխության ու երկարաժամկետ անվտանգության գործոններ են։

Գալիք տարում նախարարությունը շարունակելու է հետևողական աշխատանքը՝ հիմնվելով գիտական տվյալների, արդյունավետ վերահսկողության և հանրային մասնակցության վրա՝ ջրային ռեսուրսների և էկոհամակարգերի պահպանություն, անտառների վերականգնում, կենսաբազմազանություն և հատուկ պահպանվող տարածքների արդյունավետ կառավարում, մթնոլորտային օդի որակի բարելավում և թափոնների պատասխանատու կառավարում։ 2026 թվականը Հայաստանում լինելու է նաև միջազգային մեծ պատասխանատվության տարի. հոկտեմբերին Հայաստանը կհյուրընկալի ՄԱԿ-ի Կենսաբազմազանության մասին կոնվենցիայի կողմերի 17-րդ համաժողովը՝ COP17։

Սա հարթակ է՝ ներկայացնելու Հայաստանի բնության պահպանության տեսլականը և մեր երկրի բնական արժեքները, ինչպես նաև հաստատելու, որ Հայաստանը պատրաստ է ստանձնել գլոբալ բնապահպանական օրակարգում պատասխանատու դեր։

Վստահ եմ, որ շրջակա միջավայրի պաշտպանությունը կարող և պետք է դառնա համատեղ աշխատանքի, փոխվստահության և կայուն խաղաղության մշակույթի ամրապնդման գործոն մեր հասարակության և միջազգային գործընկերությունների շրջանակում։

Թող գալիք տարին լինի խաղաղության ամրապնդման, անվտանգ ու արժանապատիվ կյանքի և բնության հանդեպ պատասխանատվության խորացման տարի։ Թող 2026-ը դառնա այն տարին, երբ մենք ոչ միայն խոսում ենք բնության պահպանության մասին, այլև միասին վերածում ենք այն գործողությունների՝ հանուն Հայաստանի կայուն, առողջ և անվտանգ ապագայի։

Շնորհավոր Ամանոր և Սուրբ Ծնունդ։

Խաղաղություն մեր երկրին, բարօրություն մեր քաղաքացիներին և կանաչ ու կայուն ապագա Հայաստանին»։