Վարորդական իրավունքի քննական բաժիններում հերթերի հարցը կլուծվի տարեվերջից հետո (տեսանյութ)

Վարորդական իրավունքի քննական բաժիններում հերթերի հարցը կլուծվի տարեվերջից հետո, երբ որ ՆԳ  նախարարության առաջարկած նոր մոդելային փոփոխությունները  մտնեն ուժի մեջ: 

ՆԳՆ հաշվառման և քննական ստորաբաժանումների գործունեությունը կոլապսի մեջ է արդեն 2 տարի  անընդմեջ։ 

Բնակավայրից  հեռու և մոտ տեղամասերում քննություն հանձնելու օր ամրագրելու համար, մարդիկ ստիպված են լինում սպասել ոչ թե մի քանի օր, այլ շաբաթներ ու ամիսներ շարունակ։ 

Բայց իրավիճակն ավելի է բարդանում, երբ տեսական գիտելիքների ստուգումից հետո,  ապագա վարորդը  պիտի ապացուցի վարորդական կանոնների իր  իմացությունը գործնականում `  վարելով  ոստիկանի հետ։ Եթե չի հաջողվել առաջին անգամից ստանալ վկայական, ուրեմն դիմորդը  պատրաստ պիտի լինի գործնական քննությունների ամրագրման  նոր հայտ լրացնել և կրկին ամիսներով սպասել իր հերթին, կամ նորից ու նորից վճարել վարորդական քննությունների վերահանձնման  համար։ 
Քննությանը հաջորդ աշխատանքային օրը վերահանձնելու համար՝ 45․000 դրամ, երրորդ աշխատանքային օրվա համար՝ 30․000 դրամ։  երկրորդ և մյուս բոլոր բացասական արդյունքների դեպքում՝  45․000 դրամ  7-րդ  աշխատանքային օրը վերահանձնելու համար և 30․000 դրամ՝ 14-րդ աշխատանքային օրվա համար։
Իրականում այս ոլորտում օրենսդրական փոփոխություններ արվել են, բայց իրավիճակը չի շտկվում արդեն տարիներ շարունակ, վարորդական վկայականի պահանջարկը մեծ է` ռեսուրսները ` ոչ բավարար։

Անցած տարվա սեպտեմբերի 4-ին, ներքին գործերի նախարար Արփինե Սարգսյանի ներկայացրած նոր կարգավորմամբ, քաղաքացիները վարորդական վկայական ստանալու տեսական և գործնական քննությունները կարող են հանձնել հաշվառման և քննական տարբեր ստորաբաժանումներում՝ ասենք մարզերում  և  Երևանում, որը պետք է որ ՆԳՆ հաշվարկներով «բեռնաթափի» Երևանը։ 
Այս որոշումը ևս գրեթե չշտկեց Երևանի բաժնի ծանրաբեռնված վիճակը, սակայն գրեթե նույնքան ծանրաբեռնված դարձրեց մարզայինների վիճակը։ 
Միայն մի օրինակ բերենք։ 2025-ի Հոկտեմբերի սկզբին տեսական քննության համար գրանցվելիս, Երևանում ամենամոտ ազատ օրը, 2026-ի հունվարի 26-ն էր, այսինքն՝ երեք ամիս անց։ 
Մեկ ամիս առաջ էլ ՆԳ նախարար Արփինե Սարգսյանը բոլորովին այլ առաջարկով հանդես եկավ։ Նախ ընդունեց, որ կա գործնթացի կազմակերպման արհեստական բարդություններ։

 ԱԺ ամբիոնից հայտարարեց, որ ևս մեկ նոր նախագիծ կբերվի, որով իրավիճակը շտկելու համար, շուտով հաշվառման-քննական ծառայությունների մատուցման գործընթացը կարող է արտապատվիրակվել․ «նախատեսում ենք համագործակցել նաև մասնավոր ընկերությունների հետ։ Գնում ենք ինստիտուցիոնալ փոփոխությունների, մենք տարեվերջին մոդելային ամբողջ գծագրումներով նոր համակարգ  կունենանք»,-ասել է նախարարը։ 
 Փետրվարի 10-ին մեկնարկած ԱԺ քառօրյաում քննարկման դրվեց «Ճանապարհային երթևեկության անվտանգության ապահովման մասին» օրենքում լրացումներ և փոփոխություններ կատարելու մասին օրենքի նախագիծ, որը նախատեսում է միայն, խստացնել հոգեկան եւ նարկոլոգիական խնդիրներ ունեցող մարդկանց, վարորդական իրավունքից զրկելու գործընթացը, իսկ հաշվառման և քննական ստորաբաժանումների գործունեությունը թեթևացնելու, կամ արտապատվիրակելու մասին, ոչ մի բառ չի՛ պարունակում։