Առևանգել են խաբեությամբ զբաղվող call-center-ի սեփականատիրոջը․ պահանջվում է 10 մլն դոլար փրկագին

Մալայան արշիպելագի Բալի կղզում առևանգվել է call-կենտրոնների ցանցի սեփականատեր Իգոր Կոմարովը, ով, ըստ տարածվող տեղեկությունների, զբաղվում էր ռուսաստանցիների խաբեությամբ։ Միջազգային լրատվամիջոցները գրում են, որ նրան ենթարկել են բռնության, իսկ ազատման դիմաց նրա ծնողներից պահանջվում է 10 միլիոն դոլար։

Հաղորդվում է, որ Կոմարովը հանգստանում էր Բալիում՝ դնեպրոպետրովսկցի քրեական հեղինակության որդի Ալեքսանդր Պետրովսկու և բլոգեր Եվա Մ.-ի հետ։ Վերջինս սոցիալական ցանցում հրապարակել էր համատեղ լուսանկար՝ նշելով գտնվելու վայրը, ինչի արդյունքում ենթադրյալ առևանգողները պարզել են նրանց գտնվելու վայրը։ Ըստ նույն աղբյուրների՝ Ալեքսանդր Պետրովսկուն և բլոգերը կարողացել են փախչել, իսկ Կոմարովը առևանգվել է։

Հետագայում համացանցում տարածվել է տեսանյութ, որտեղ Կոմարովը, կապտած դեմքով, խոսում է ռուսաստանցիների խաբեության սխեմաների և հնարավոր հովանավորների մասին։ Նա նաև պնդում է, որ Դնեպրում գործում է կազմակերպված հանցավոր խմբավորում, որը կապված է call-կենտրոնների գործունեության հետ։ Տեղեկությունները պաշտոնապես չեն հաստատվել, իսկ իրավապահ մարմինները միջադեպի վերաբերյալ հրապարակային մեկնաբանություն դեռևս չեն արել։