ԱՄՆ-ն և Իսրայելը նոր հարվածներ են հասցրել Թեհրանին

Իրանական ISNA լրատվական գործակալության հաղորդմամբ՝ ԱՄՆ-ն և Իսրայելը նոր հարվածներ են հասցրել Թեհրանին։

Լրագրողների տվյալներով՝ հարձակումները տեղի են ունեցել մարտի 2-ի վաղ առավոտյան՝ «առավոտյան աղոթքի կոչի հետ միաժամանակ»։ Պայթյուններ են լսվել քաղաքի արևելյան, արևմտյան և հարավային թաղամասերում։

Մարտի 2-ի առավոտյան «Ալ Հադաթ» հեռուստաընկերությունը նույնպես հաղորդել է Իրանի կենտրոնում տեղի ունեցած հզոր պայթյունների շարքի մասին։ Հիմնական հարվածները հասցվել են Սպահան և Յազդ քաղաքներին, ինչպես նաև Թեհրանին։ Սպահանում կան Իրանի պաշտպանության համար կարևորագույն օբյեկտներ և գործարաններ, մինչդեռ Յազդը երկրի խոշոր պատմական և արդյունաբերական կենտրոն է, որտեղ հնարավոր է տեղակայված լինեն ռազմավարական օբյեկտներ։

Իրանում պայթյունները տեղի են ունեցել ԱՄՆ-ի և Իսրայելի հետ լարվածության սրման ֆոնին, որոնք փետրվարի 28-ին ռազմական գործողություններ են սկսել Իսլամական Հանրապետության դեմ։ Ի պատասխան՝ Իրանը հարվածել է Իսրայելի տարածքին և Մերձավոր Արևելքում գտնվող ամերիկյան ռազմական բազաներին։