«Մենք կարիք չունենք, որ մեկ այլ երկիր պատերազմի մեզ համար». ՀՀ-ում Իրանի դեսպանը՝ ՌԴ-ից և ՉԺՀ-ից ակնկալիքների մասին

Հայաստանում Իրանի Իսլամական Հանրապետության դեսպան Խալիլ Շիրղոլամին հայտարարել է, որ Իրանը չի ակնկալում, որ որևէ երկիր պատերազմ մղի իր փոխարեն, սակայն կարևորում է գործընկեր պետությունների աջակցությունը ներկայիս փուլում։

«Մենք կարիք չունենք, որ մեկ այլ երկիր պատերազմի մեզ համար, սակայն կարևոր է գործընկեր պետությունների աջակցությունը այս փուլում»,– նշել է դեսպանը՝ անդրադառնալով Ռուսաստանի և Չինաստանի հետ հարաբերություններին։

«Ագրեսիան վտանգում է տարածաշրջանային խաղաղությունը»
Դեսպանի խոսքով՝ Իրանի դեմ իրականացված գործողությունները անմիջական սպառնալիք են տարածաշրջանային անվտանգության համար։

«Եթե այս գործողությունները շարունակվեն, ապա տարածաշրջանում գտնվող բոլոր երկրների համար կստեղծվեն ոչ բարենպաստ պայմաններ։ Նրանք, ովքեր իրականացրեցին այս գործողությունները մեր նկատմամբ, ոչ պատասխանատու կերպով վտանգի ենթարկեցին թե՛ տարածաշրջանային, թե՛ միջազգային կայունությունն ու խաղաղությունը»,–ասել է Շիրղոլամին։

Նա ընդգծել է, որ Իրանի համար չափազանց կարևոր է բարեկամ և հարևան Հայաստանի անվտանգությունը՝ շեշտելով, որ Հայաստանի տարածքային ամբողջականությունը Իրանի համար «կարմիր գիծ» է։

«Մեր ցանկությունն է, որ Հայաստանը երբևէ որևէ վնաս չկրի միջազգային օրենքը խախտողների գործողությունների հետևանքով»,– նշել է դեսպանը։

ԱՄՆ-ի և Իսրայելի հասցեին մեղադրանքներ

Դեսպանի հայտարարությամբ՝ ԱՄՆ-ի և «սիոնիստական ռեժիմի» հարձակումը տեղի է ունեցել այն ժամանակ, երբ Իրանը Միացյալ Նահանգներին ներկայացրել էր իր «օպերատիվ, ճշգրիտ և իրականանալու մեծ շանսեր ունեցող առաջարկները»։

«Մեզ համար շատ զարմանալի է, թե այն համակարգը, որը չի կարող հավատարիմ մնալ բանակցությունների սկզբունքներին, ինչպես է առհասարակ որոշել մտնել բանակցությունների փուլ։ Քանի դեռ կշարունակվի այս ագրեսիան, մենք կշարունակենք ինքնապաշտպանությունը»,– նշել է Շիրղոլամին։

Անդրադառնալով Իրանի պատասխան քայլերին՝ դեսպանը շեշտել է, որ դրանք ուղղված չեն հարևան երկրների դեմ, այլ՝ տարածաշրջանում տեղակայված ամերիկյան ռազմաբազաների։