Եվրոպայում գազի գինը հատել է 500 դոլարի շեմը․ շուկան արձագանքում է Մերձավոր Արևելքի լարվածությանը

Եվրոպական շուկայում բնական գազի գինը կտրուկ աճել է՝ անցնելով 500 դոլարը հազար խորանարդ մետրի համար։ «ՏԱՍՍ»-ի փոխանցմամբ՝ հղում անելով Լոնդոնի Intercontinental Exchange (ICE) բորսայի տվյալներին, ապրիլյան ֆյուչերսների արժեքը հասել է 515 դոլարի՝ դառնալով ամենաբարձր ցուցանիշը հունվարից ի վեր։

Գների թռիչքը գրանցվել է այն բանից հետո, երբ QatarEnergy ընկերությունը դադարեցրել է հեղուկացված բնական գազի արտադրությունը Ռաս Լաֆֆանի իր օբյեկտներում՝ հրթիռային հարվածից հետո։ Բացի այդ, Նիդերլանդներում գործող TTF հաբի ինդեքսով գազի ֆյուչերսները առևտրի մեկնարկին աճել են գրեթե 28 տոկոսով՝ արձանագրելով ամենաուժեղ թռիչքը 2023 թվականի օգոստոսից հետո։

Ռուսաստանի արտաքին գործերի նախարարությունը նախազգուշացրել է, որ Իրանի կողմից Օրմուզի նեղուցի հնարավոր փակումը կարող է հանգեցնել Պարսից ծոցից ածխաջրածինների արտահանման դադարեցման։ Դա կստեղծի լուրջ անհավասարակշռություն համաշխարհային նավթի և հեղուկացված բնական գազի շուկաներում՝ խորացնելով արդեն առկա էներգետիկ ճգնաժամը։