Հասել ենք մի հանգրվանի, երբ կարողանում ենք պաշտպանվել աշխարհաքաղաքական աղետներից․ Փաշինյան

Երբեմն նույնիսկ այսօր մեզ հետ տարածաշրջանում տեղի են ունենում իրադրություններ, որոնց պատճառահետևանքային կապերը մենք միանգամից չէ, որ տեսնում և նկատում ենք, բայց լավ լուրն այն է, որ մենք գնալով ավելի ու ավելի շատ ենք տեսնում: Սա նշանակում է, որ ավելի շատ գործիքների ենք տիրապետում մեր շուրջ միջավայրը, մեր շուրջ կլիման մեզ համար ավելի կանխատեսելի և կառավարելի դարձնելու ուղղությամբ: Այդ մասին Դիվանագետի օրվան նվիրված միջոցառման ժամանակ ասաց վարչապետ Նիկոլ Փաշինյանը:

«Այս առումով այն իրադրությունը, որ մենք ունենք այսօր Հայաստանում արտաքին քաղաքական միջավայրի առումով, կարծում եմ՝ բավականին շոշափելի և մեծ ձեռքբերում է, բայց, կարծում եմ՝ մենք չպետք է մոռանանք մեր դիվանագիտության և դիվանագիտական գործունեության, արտաքին հարաբերությունների ոլորտում մեր գործունեության ամենակարևոր նպատակը, որը մեր երկրի պետական շահը, այն է՝ մեր երկրի տնտեսական զարգացումն ապահովելն է, որովհետև դա էլ է խնդիր, որ մենք այդքան շատ կենտրոնացած ենք անվտանգության վրա, որը, իհարկե, կենսական անհրաժեշտություն է, բայց ինչքան անմիջական են մեր լարվածությունը և մեր կարիքը անվտանգության, այդքան նշանակում է, որ մենք հեռու ենք տնտեսական զարգացման տրամաբանությունից: Մենք այդքան քիչ ժամանակ և ուշադրություն ենք դարձնում տնտեսական զարգացմանը և պետք է արձանագրենք, որ վերջին տարիների պրոցեսները ակնհայտորեն վկայում են իրադրության դիտանկյունի փոփոխության մասին: Երբ մենք տարածաշրջանում, այդ թվում՝ Ադրբեջանի հետ խաղաղության գործընթացի վերաբերյալ խոսելիս ասում ենք, որ կարծես տնտեսությունը վազանցում է քաղաքական պրոցեսներին, ինչը, միանշանակ, դրական է, ինչը նշանակում է, որ մեր դիվանագիտական ջանքերը ավելի են կենտրոնացած տնտեսական զարգացման տրամաբանության վրա, որովհետև ինչքան մենք կենտրոնացած ենք տնտեսական զարգացման տրամաբանության վրա, նշանակում է՝ այնքան հեռացած ենք զուտ լարվածության և էսկալացիայի տրամաբանությունից և շրջանակից:

Ես կարծում եմ, որ այն իրադրությունը, որ մենք ունենք, իմիջիայլոց շատ կարևոր է, որ մենք գնահատենք այն խաղաղությունը, որ մենք ունենք, շատ կարևոր է, որ մենք գնահատենք Հայաստանում տեղի ունեցող ապաշրջափակումը, Հայաստանի շուրջ տեղի ունեցող ապաշրջափակումը, որը մենք ունենք: Իմիջիայլոց, ի հեճուկս և՛ ներքին, և՛ արտաքին փորձագետների կանխատեսումների՝ Հայաստանի տնտեսական զարգացումը ավելին է, քան կանխատեսվում է, այդ թվում՝ դիվանագիտական գործունեության հաշվին, որը մենք իրար հետ ծավալում ենք, և այս ձեռքբերումները պետք է կարողանանք ընդգծել, պետք է կարողանանք ձեռքբերումները պաշտպանել, որովհետև, կարծում եմ, որ մենք իսկապես հասել ենք մի հանգրվանի, երբ կարողանում ենք պաշտպանվել փոթորիկներից, կարկուտներից և բազում աշխարհաքաղաքական աղետներից, բայց սա էլ մենք չպետք է ընդունենք որպես ինքնին հասանելի մի բան, սա գիտակցված աշխատանքի արդյունք է»,- նշել է Փաշինյանը: