Դեմոկրատները կասկածի տակ են դնում Իրանի հարվածների հիմնավորումը՝ նշելով, որ սպառնալիքը վերաբերում էր Իսրայելին, ոչ թե ԱՄՆ-ին

ԱՄՆ Կոնգրեսի դեմոկրատ անդամները կասկածի տակ են դրել նախագահ Դոնալդ Թրամփի վարչակազմի պնդումները, թե Իրանի դեմ հարվածները պայմանավորված էին ԱՄՆ-ին սպառնացող անմիջական վտանգով՝ ընդգծելով, որ Թեհրանի հնարավոր գործողությունները վերաբերում էին Իսրայելին, ոչ թե Միացյալ Նահանգներին, հաղորդում է AL-JAZEERA-ն՝ հղում անելով The Guardian-ին։

Սենատոր Մարկ Ուորները հայտարարել է, որ «Իրանի կողմից ԱՄՆ-ին ուղղված անմիջական սպառնալիք չի եղել»՝ նշելով, որ վտանգը վերաբերում էր Իսրայելին։ Նրա խոսքով՝ եթե Իսրայելին ուղղված սպառնալիքը հավասարեցվի ԱՄՆ-ին ուղղված անմիջական վտանգին, ապա դա կարող է ստեղծել վտանգավոր նախադեպ։

Իր հերթին, Տեխասից կոնգրեսական Խոակին Կաստրոն քննադատել է պետքարտուղար Մարկո Ռուբիոյի հայտարարությունները՝ պնդելով, որ դրանք ենթադրում են, թե Իսրայելի գործողությունները վտանգի տակ են դրել ամերիկյան ուժերին, իսկ վարչակազմը փաստացի ներգրավվել է պատերազմին՝ դիվանագիտական ճանապարհն ընտրելու փոխարեն։