Ֆրանսիան Rafale կործանիչներ է ուղարկել ԱՄԷ՝ իր ռազմաբազաները Իրանի հարձակումներից պաշտպանելու համար

Ֆրանսիան կործանիչներ է տեղակայել Արաբական Միացյալ Էմիրություններում՝ իր ռազմական օբյեկտները Իրանի հնարավոր հարձակումներից պաշտպանելու նպատակով։ Այս մասին հայտարարել է Ֆրանսիայի արտաքին գործերի նախարար Ժան-Նոել Բարոն՝ հաղորդում է BFMTV-ն։ Նրա խոսքով՝ Rafale կործանիչներն ու դրանց օդաչուները մոբիլիզացվել են ֆրանսիական ռազմաբազաների անվտանգությունն ապահովելու համար, իսկ կիրակի օրը Էմիրություններում գտնվող ֆրանսիական բազայի անգարներից մեկը խոցվել է անօդաչու թռչող սարքով։

Բարոն նշել է, որ Ֆրանսիան ԱՄԷ-ում տեղակայել է նաև հարյուրավոր զինծառայողներ՝ ռազմածովային, ռազմաօդային և ցամաքային ուժերից։ Rafale կործանիչները տեղակայված են Ալ Դաֆրա ավիաբազայում՝ Աբու Դաբիի մերձակայքում, և իրականացնում են օդային տարածքի անվտանգության ապահովման գործողություններ։

Ավելի վաղ ֆրանսիացի քաղաքական գործիչ, «Հայրենասերներ» աջ կուսակցության առաջնորդ Ֆլորիան Ֆիլիպոն կոչ էր արել Ֆրանսիայի քաղաքացիներին հանդես գալ Մերձավոր Արևելքում պատերազմի դեմ և միանալ համապատասխան միջնորդագրին։