Մեծ Բրիտանիայում ուսանողները հայտնաբերել են մահապատժի ենթարկված վիկինգների աճյուններ

Մեծ Բրիտանիայի Քեմբրիջ քաղաքի ծայրամասում հայտնաբերվել են 10 վիկինգների աճյուններ։ Ինչպես հայտնում է People-ը, հայտնագործությունը կատարել են Քեմբրիջի համալսարանի ուսանող-հնագետները։ Գտնված ոսկորները պատկանում են երիտասարդ տղամարդկանց․ նրանցից մի քանիսը եղել են կապկպված, մեկի մոտ բացակայել է գլուխը։

Հատուկ ուշադրություն է գրավել ավելի քան 1,9 մետր հասակ ունեցող տղամարդու կմախքը, որի գանգի վրա հայտնաբերվել են տրեպանացիայի հետքեր։ Գիտնականների գնահատմամբ՝ վիկինգների ժամանակաշրջանում նման բարձր հասակ ունեցող մարդիկ հազվադեպ էին հանդիպում։ Հետազոտողները ենթադրում են, որ հայտնաբերված տղամարդկանց մի մասը դատապարտված է եղել մահապատժի․ նախ ենթարկվել են մարմնական պատժի, ապա նետվել են փոսը։

Մնացած աճյունները, հավանաբար, պատկանում են մարտերի զոհ դարձած վիկինգներին։ Գիտնականների կարծիքով՝ նրանցից ոմանց մասնատված մարմինները կարող էին ցուցադրվել որպես ավար, ապա նույնպես նետվել նույն փոսը։ Աճյունները թվագրվում են մ.թ. IX դարով։