Հայաստանն ու Բուլղարիան ունեն դարավոր պատմական կապեր. նախագահը՝ Բուլղարիայի դեսպանին

Հանրապետության նախագահ Վահագն Խաչատուրյանն Ազգային տոնի կապակցությամբ ընդունել է Հայաստանի Հանրապետությունում Բուլղարիայի արտակարգ և լիազոր դեսպան Նիկոլա Նիկոլովին։

Նախագահ Խաչատուրյանը շնորհավորել է բարեկամ Բուլղարիայի ժողովրդին, երկրի ղեկավարությանը և դեսպանին՝ մաղթելով բարօրություն և շարունակական հաջողություններ։

Շնորհակալություն հայտնելով ընդունելության, շնորհավորանքի և բարեմաղթանքների համար՝ դեսպանը նշել է, որ իր համար մեծ պատիվ է հյուրընկալվել նախագահի նստավայրում։

«Հայաստանն ու Բուլղարիան ունեն դարավոր պատմական, մշակութային և հոգևոր ամուր կապեր»,- նշել է դեսպանը՝ հավելելով, որ գործադրում է բոլոր ջանքերը երկկողմ կապերի ընդլայնման և ամրապնդման ուղղությամբ։

Հանդիպման ընթացքում անդրադարձ է կատարվել երկու երկրների հարաբերությունների ամրապնդման հնարավորություններին։ Կողմերը կարևորել են ինչպես երկկողմ ձևաչափում, այնպես էլ Եվրոպական միության հարթակում արդյունավետ և համակարգված համագործակցությունը։

Անդրադարձ է կատարվել նաև տարածաշրջանային իրողություններին և հաղորդակցության ուղիների ապաշրջափակման հեռանկարում բացվող հնարավորություններին՝ ինչպես տարածաշրջանի երկրների, այնպես էլ Հայաստան-Բուլղարիա տնտեսական կապերի խթանման տեսանկյունից։ Կողմերը մտքեր են փոխանակել նաև TRIPP նախագծի վերաբերյալ՝ կարևորելով դրա ներդրումը տարածաշրջանային համագործակցության խորացման գործում։

Հանդիպման ընթացքում կարևորվել է ժողովրդավարական ինստիտուտների և արժեքների կայացումն ու ամրապնդումը՝ որպես կայուն զարգացման և փոխվստահության հիմք։