ԱՄՆ-ը հարվածել է Չաբահարին՝ Իրանի, Ռուսաստանի և Չինաստանի նավատորմերի նախկին զորավարժությունների շրջանում

ԱՄՆ զինված ուժերը հարված են հասցրել Իրանի Չաբահար նավահանգստի պիրսին՝ այն տարածքում, որի մերձակայքում ավելի վաղ անցկացվել էին Իրանի, Ռուսաստանի և Չինաստանի համատեղ ռազմածովային զորավարժությունները։ Այս մասին հաղորդում է USNI News մասնագիտացված պարբերականը։

Պարբերականը հիշեցնում է, որ մի քանի շաբաթ առաջ Չաբահարի շրջանում անցկացվել էին «Անվտանգության գոտի» (Belt of Security) անունով համատեղ զորավարժություններ, որոնց մասնակցել էին երեք երկրների ռազմական նավերը։ Տարածաշրջանը ռազմավարական նշանակություն ունի, քանի որ գտնվում է Օրմուզի նեղուցի մերձակայքում։

Ավելի վաղ ամերիկյան TWZ պարբերականը գրել էր, որ Չինաստանի և Ռուսաստանի ռազմածովային ուժերի նավերը, որոնք գտնվել էին Օրմուզի նեղուցում, չեն խոչընդոտի ԱՄՆ հնարավոր գործողություններին Իրանի դեմ և կարող են լքել տարածաշրջանը նախքան նման գործողությունների մեկնարկը։