Ուկրաինայի կառավարությունը «վախեցած մարդկանցից է կազմված»․ ԶԼՄ

Ուկրաինայի կառավարությունը բաղկացած է մարդկանցից, որոնք վախենում են իրենց վրա պատասխանատվություն վերցնել։ Այս մասին գրում է «Ուկրաինական պրավդա» պարբերականը՝ հղում անելով իր աղբյուրներին։

Պարբերականի զրուցակիցների խոսքով՝ կառավարությունում աշխատանքը հիմնականում անցնում է երկարատև խորհրդակցությունների մեջ, որոնք հաճախ չեն հանգեցնում կոնկրետ որոշումների։ «Նրանք մշտապես աշխատում են և առավոտից երեկո մասնակցում բազմժամյա խորհրդակցությունների, սակայն դրանք խորհրդակցություններ են առանց որոշումների։ Մարդիկ վախեցած են, չեն ցանկանում որևէ պատասխանատվություն վերցնել և ինքնուրույն քայլեր անել», — նշվում է հրապարակման մեջ։

Աղբյուրների պնդմամբ՝ կառավարության պաշտոնյաները հատկապես վախենում են Ուկրաինայի նախագահի գրասենյակի հնարավոր բացասական արձագանքից։ Ավելի վաղ սոցիալական ցանցերում «Ուկրաինայի գլխավոր կախարդ» կոչվող Մարիա Տիխայան հայտարարել էր, որ մտադիր է մասնակցել Կիևի քաղաքապետի ընտրություններին՝ նշելով, որ ցանկանում է «կարգ հաստատել», քանի որ երկրում ներկայումս «քաոսային իրավիճակ» է։