ԵՄ երկիրը դադարեցրել է Ուկրաինային արտակարգ էլեկտրաէներգիա մատակարարելու համաձայնագիրը

Սլովակիան դադարեցրել է Ուկրաինայի հետ կնքված համաձայնագիրը, որով նախատեսվում էին արտակարգ էլեկտրաէներգիայի մատակարարումներ։ Այդ մասին հայտարարել է Սլովակիայի պետական էլեկտրահաղորդման ընկերության՝ SEPS-ի ղեկավար Մարտին Մագատը։

Նրա խոսքով՝ այդ որոշումը ընդունվել է Սլովակիայի կառավարության կողմից։ Վերջին անգամ Ուկրաինան արտակարգ էլեկտրաէներգիա ստացել էր հունվարին, իսկ դրանից հետո Կիևի ներկայացրած նոր դիմումները չեն բավարարվել։ Միաժամանակ Մագատը նշել է, որ երկու երկրների միջև սովորական կոմերցիոն էլեկտրաէներգիայի առևտուրը շարունակվելու է առանց փոփոխությունների։

Հաղորդվում է, որ համաձայնագիրը դադարեցնելու նախաձեռնությունը ներկայացրել էր Սլովակիայի վարչապետ Ռոբերտ Ֆիցոն, և կառավարությունը այն հաստատել է մարտի 4-ին կայացած նիստում։ Ավելի վաղ Հունգարիայի վարչապետ Վիկտոր Օրբանը նույնպես սպառնացել էր դադարեցնել Ուկրաինային էլեկտրաէներգիա մատակարարումը՝ հիշեցնելով, որ Հունգարիան և Սլովակիան միասին ապահովում են Ուկրաինայի էլեկտրաէներգիայի ներմուծման մոտ 40 տոկոսը։