ԱՄՆ-ը մեծացնում է զինատեսակների արտադրությունը Իրանի դեմ գործողություններից հետո

ԱՄՆ վարչակազմը նախատեսում է Սպիտակ տանը հանդիպում անցկացնել երկրի խոշորագույն ռազմական արդյունաբերական ընկերությունների ղեկավարների հետ՝ քննարկելու զինատեսակների արտադրության արագացման հարցը։ Reuters-ի տվյալներով՝ նախաձեռնությունը պայմանավորված է այն հանգամանքով, որ Իրանի դեմ վերջին ռազմական գործողությունները զգալիորեն նվազեցրել են ԱՄՆ զինանոցում պահվող սպառազինության պաշարները։

Հանդիպմանը հրավիրվել են պաշտպանական ոլորտի խոշոր ընկերություններ, այդ թվում՝ Lockheed Martin և RTX (Raytheon)։ Վաշինգտոնում մտահոգություն կա, որ վերջին տարիներին իրականացված ռազմական գործողությունները՝ Ուկրաինայի պատերազմին տրամադրված օգնությունը, Գազայի պատերազմը և այժմ նաև Իրանի դեմ հարվածները, զգալիորեն օգտագործել են ԱՄՆ զինամթերքի պաշարները, այդ թվում՝ հրթիռներ, հրետանային համակարգեր և հակատանկային զինատեսակներ։

Հաղորդվում է նաև, որ Պենտագոնը կարող է դիմել Կոնգրեսին մոտ 50 միլիարդ դոլարի լրացուցիչ բյուջե տրամադրելու համար՝ Մերձավոր Արևելքում իրականացվող գործողություններից հետո սպառված զինատեսակների պաշարները վերականգնելու նպատակով։ Միաժամանակ Թրամփի վարչակազմը ճնշում է գործադրում պաշտպանական ընկերությունների վրա՝ պահանջելով արագացնել արտադրությունը և առաջնահերթ համարել պետական պատվերները։