Պենտագոնը հայտնել է Իրանի պատերազմի ընթացքում զոհված առաջին ամերիկացի զինվորների մասին

ԱՄՆ պաշտպանության նախարարությունը հայտարարել է Իրանի հետ պատերազմի ընթացքում զոհված առաջին ամերիկացի զինվորների անունները։ Reuters-ի փոխանցմամբ՝ նրանք զոհվել են Քուվեյթում ամերիկյան ռազմական օբյեկտի վրա իրականացված անօդաչու հարձակման հետևանքով։

Պենտագոնի տվյալներով՝ զոհված զինվորները ծառայել են ԱՄՆ բանակի պահեստազորի՝ Այովա նահանգում տեղակայված 103-րդ մատակարարման հրամանատարությունում։ Հարձակումը տեղի է ունեցել մարտի 1-ին Քուվեյթի Պորտ Շուայբա ռազմական օբյեկտում, որտեղ անօդաչու սարքը բախվել է բազայի տարածքին։ Զոհված զինվորները եղել են 20-ից 42 տարեկան։

ԱՄՆ զինվորականների զոհերի թիվը ներկայում հասել է վեցի։ Միաժամանակ ԱՄՆ Կենտրոնական հրամանատարությունը հայտնել է, որ Իրանը արդեն արձակել է ավելի քան 500 բալիստիկ հրթիռ և 2000-ից ավելի անօդաչու սարք Մերձավոր Արևելքում գտնվող ամերիկյան և դաշնակից օբյեկտների ուղղությամբ։ Վաշինգտոնը չի բացառել, որ հակամարտության սրման դեպքում ամերիկյան բանակը կարող է ունենալ նոր կորուստներ։