Մարդ կա՝ մի ամիս է՝ Շրի Լանկայից լողազգեստով նկարներ է հրապարակում, ուրեմն վճարունակ է, կարող է տոմս գնել. Միրզոյան

«Մեծ մասն արտերկրում է զբոսաշրջային նպատակներով, նշանակում է՝ վճարունակ են»,– այսպես է Արարատ Միրզոյանը բացատրել Օմանից ՀՀ ավիատոմսերի թանկ լինելը։

«Կառավարությունը մարդկանց տալիս է ավտոբուս, վճարում է դրա համար և Դուբայից հասցնում է Մասկատի օդանավակայան։ Մնացածը մասնավոր ավիաընկերության հարց է։ Խոսքն այն քաղաքացիների մասին է, որոնք, մեծ հավանականությամբ, գնացել են այդտեղ զբոսաշրջային նպատակներով, կարող են լինել նաև այլ պատճառներ։ Բայց ներողություն, եթե մի մարդ, որը համարյա մի ամիս է՝ Շրի Լանկայում ինչքան հնարավոր է՝ լողազգեստով նկար է գցել, նշանակում է՝ վճարունակ է, չէ՞, կարող է տոմս գնել։ Մի քիչ արդար չի պահանջը կառավարության նկատմամբ։ Կլինե՞ն այլ խմբեր, կմտածենք, կդիտարկենք նաև ֆինանսական այդ բեռը մեր վրա վերցնելու հարցը»,-ասել է Միրզոյանը։

Նա նաև նշել է, որ «Օմանում ունենք 2 քաղաքացի, որոնք ցանկություն չունեն վերադառնալու, Իսրայելում 15 քաղաքացի ունեն, որոնցից 5-ի հետ մշտական կապի մեջ ենք, ովքեր ուզում են վերադառնալ։ 17 քաղաքացի ունենք Քուվեյթում, նրանք էլ են ուզում վերադառնալ, դեռևս իրատեսական ուղիներ չկան, բայց բոլորն անվտանգ են։

«Դոհայում ևս ունենք քաղաքացիներ, որոնց վերադառնալու հնարավորություն առայժմ չկա, բայց բոլորն ապահովված են հյուրանոցով և սնունդով, քաղաքացիներից երկուսը նաև դեղորայքի կարիք է ունեցել, դեսպանության միջոցներով է հասցվել։ 1 քաղաքացի կա Վիետնամում, 117 քաղաքացիներ՝ Հնդկաստանում»,- հավելել է Միրզոյանը։