Իսրայելի ԱԳ նախարարը բացահայտել է Իրանի դեմ ռազմական գործողության նպատակը

Իսրայելի արտաքին գործերի նախարար Գիդեոն Սաարը հայտարարել է, որ Իրանի դեմ լայնածավալ ռազմական գործողությունը անհրաժեշտ էր՝ կանխելու համար Թեհրանի կողմից միջուկային զենքի ձեռքբերումը։ Այս մասին նա գրել է սոցիալական ցանց X-ում՝ ամփոփելով Ճապոնիայի արտաքին գործերի նախարար Տոսիմիցու Մոտեգիի հետ ունեցած զրույցը։

Սաարի խոսքով՝ եթե Իսրայելը չգործեր ժամանակին, Իրանը կարող էր իր միջուկային ծրագիրը տեղափոխել ավելի խորը ստորգետնյա օբյեկտներ և արդյունքում ձեռք բերել միջուկային զենք՝ Հյուսիսային Կորեայի օրինակով։ Նա ընդգծել է, որ նման սցենարը մեծ վտանգ կներկայացներ տարածաշրջանի անվտանգության համար։

Միաժամանակ Իսրայելի դիվանագիտության ղեկավարը նշել է, որ կարևոր է շարունակել ամրապնդել հարաբերությունները Ճապոնիայի հետ՝ ընդգծելով երկու երկրների միջև սերտ համագործակցության հեռանկարները։ Ավելի վաղ ԱՄՆ նախագահ Դոնալդ Թրամփը հայտարարել էր, որ Իսրայելի նախագահ Իցհակ Հերցոգը պետք է ներում շնորհի վարչապետ Բենիամին Նեթանյահուին նրա դեմ երկարատև դատական գործընթացների ֆոնին։