Հունգարիան կարտաքսի մեծ գումար տեղափոխելու համար ձերբակալված յոթ ուկրաինացիներին

Հունգարիայի իշխանությունները որոշել են արտաքսել այն յոթ Ուկրաինայի քաղաքացիներին, որոնք ձերբակալվել էին խոշոր գումար և ոսկի տեղափոխելու կասկածանքով։ Այս մասին հայտարարել է Հունգարիայի կառավարության միջազգային հաղորդակցության և հարաբերությունների հարցերով պետքարտուղար Զոլտան Կովաչը, հաղորդում է The Guardian-ը։

Կովաչի խոսքով՝ հետաքննության ընթացքում պարզվել է, որ գումարի տեղափոխման գործողությունը ղեկավարել է Ուկրաինայի անվտանգության ծառայության նախկին գեներալը, իսկ նրա տեղակալը եղել է Ուկրաինայի ռազմաօդային ուժերի նախկին մայորը։ Գործողությանը մասնակցել են նաև ռազմական փորձ ունեցող այլ անձինք։

Պաշտոնյայի խոսքով՝ այս եզրակացությունների հիման վրա որոշում է կայացվել բոլոր յոթ ուկրաինացիներին արտաքսել երկրից։ Ավելի վաղ նրանք ձերբակալվել էին Բուդապեշտում՝ փողերի լվացման կասկածանքով, երբ տեղափոխում էին խոշոր գումարներ և ոսկի։