Ուկրաինան սպառնացել է պատասխան քայլերով՝ Հունգարիային մեղադրելով «պետական բանդիտիզմի» մեջ

Ուկրաինայի արտաքին գործերի նախարար Անդրեյ Սիբիգան հայտարարել է, որ Կիևը չի հանդուրժի Հունգարիայի գործողությունները և պատրաստ է պատասխան քայլերի դիմել։ Այս մասին նա գրել է սոցիալական ցանց X-ում՝ մեկնաբանելով Բուդապեշտում յոթ ուկրաինացիների ձերբակալությունը։

Նրա խոսքով՝ տեղի ունեցածը «շանտաժ» է և կապված է Հունգարիայում ընթացող նախընտրական գործընթացների հետ։ Սիբիգան հայտարարել է, որ Ուկրաինան «չի հանդուրժի պետական բանդիտիզմը» և պատասխանատվության կենթարկի բոլոր նրանց, ովքեր ներգրավված են ուկրաինացիների ձերբակալության մեջ։

Ուկրաինայի ԱԳ նախարարը նաև նշել է, որ Կիևը կարող է Հունգարիայի դեմ կիրառել պատասխան միջոցներ՝ ներառյալ պատժամիջոցներ և այլ սահմանափակումներ։ Մինչդեռ Հունգարիայի հարկային և մաքսային ծառայությունը հայտարարել է, որ ուկրաինացիների ձերբակալությունը կապված է փողերի լվացման կասկածանքով ընթացող հետաքննության հետ։