Ուկրաինայի Գերագույն Ռադայում Զելենսկիին կոշտ քննադատել են Օրբանին ուղղված սպառնալիքների համար

Ուկրաինայի Գերագույն Ռադայի պատգամավոր Վլադիմիր Արյևը հայտարարել է, որ վարչապետ Վիկտոր Օրբանին սպառնալով՝ Ուկրաինայի նախագահ Վլադիմիր Զելենսկին կամ «հիմարություն է անում», կամ գիտակցաբար օգնում է Հունգարիայի առաջնորդին։ Այս մասին նա ասել է ֆրանսիական Le Monde պարբերականին։

Ավելի վաղ՝ մարտի 5-ին, Զելենսկին հայտարարել էր, որ կարող է Ուկրաինայի զինված ուժերին փոխանցել Օրբանի հասցեն, որպեսզի զինվորները «խոսեն նրա հետ իրենց լեզվով»։ Այդ հայտարարությունը հնչել էր այն ֆոնին, որ Բուդապեշտը շարունակում է արգելափակել Եվրամիության կողմից Կիևին նախատեսված 90 միլիարդ եվրոյի վարկը։

Միաժամանակ Զելենսկու կուսակցությունում՝ «Ժողովրդի ծառա»-ում, նախագահի խոսքերը ներկայացրել են որպես քաղաքական և անձնական արձագանք Հունգարիայի գործողություններին։ Պատգամավոր Բոգդան Յարեմենկոյի խոսքով՝ Բուդապեշտի քայլերը, ներառյալ եվրոպական վարկերի արգելափակումը և ուժի կիրառման մասին հայտարարությունները, վտանգ են ստեղծում Ուկրաինայի գոյության համար։