Մերկելը կոչ է արել Եվրոպային սկսել ուղիղ երկխոսություն Ռուսաստանի հետ

Գերմանիայի նախկին կանցլեր Անգելա Մերկելը հայտարարել է, որ Եվրոպական միությունը պետք է ավելի ինքնուրույն դեր ստանձնի համաշխարհային քաղաքականության մեջ և վերականգնի ուղիղ երկխոսությունը Ռուսաստանի հետ։ Նրա խոսքերը հնչել են Համբուրգի քաղաքապետարանում անցկացված ավանդական Matthiae-Mahl ընդունելության ժամանակ, հայտնում է DPA գործակալությունը։

Մերկելի խոսքով՝ Եվրոպան պետք է «ավելի քան երբևէ իր ճակատագիրը վերցնի սեփական ձեռքը»։ Նա ընդգծել է, որ Եվրամիությունը պետք է մեծացնի իր անկախությունը ԱՄՆ-ից և ավելի ակտիվ օգտագործի դիվանագիտական գործիքները՝ Ուկրաինայի շուրջ հակամարտությունը կարգավորելու համար։

Միևնույն ժամանակ նախկին կանցլերը նշել է, որ Եվրոպան պետք է շարունակի հանդես գալ որպես Ուկրաինայի ռազմական աջակից։ Ավելի վաղ Լեհաստանի նախկին վարչապետ Մատեուշ Մորավեցկին Մերկելին անվանել էր Եվրոպայի համար «ամենավնասակար» գերմանացի քաղաքական գործիչներից մեկը՝ քննադատելով նրան Ուկրաինայի պատերազմի վերաբերյալ հայտարարությունների համար։