Ինչու ԱՄՆ Կոնգրեսը այլևս պաշտոնապես պատերազմ չի հայտարարում

ԱՄՆ-ում վերջին տասնամյակներին պատերազմները գրեթե երբեք պաշտոնապես չեն հայտարարվում Կոնգրեսի կողմից, թեև երկիրը հաճախ ներգրավվում է ռազմական գործողությունների մեջ։ CNN-ի վերլուծության համաձայն՝ օրինակ Իրանի դեմ ԱՄՆ-ի և Իսրայելի գործողությունները փաստացի պատերազմ են, սակայն պաշտոնապես այդպես չեն կոչվում, քանի որ Սպիտակ տունը չի դիմել Կոնգրեսին պատերազմ հայտարարելու համար։

Պատմականորեն ԱՄՆ նախագահները պատերազմի մասին որոշումը ներկայացնում էին Կոնգրեսին․ այդպես են վարվել Վուդրո Վիլսոնը 1917 թվականին և Ֆրանկլին Ռուզվելտը 1941-ին՝ Փերլ Հարբորի վրա հարձակումից հետո։ Սակայն Երկրորդ համաշխարհային պատերազմից հետո ԱՄՆ-ը մասնակցել է բազմաթիվ հակամարտությունների՝ Կորեայում, Վիետնամում, Իրաքում և Աֆղանստանում, որոնք պաշտոնապես չեն հայտարարվել որպես պատերազմ։

Փորձագետների կարծիքով՝ նախագահները այժմ հաճախ սկսում են ռազմական գործողություններ առանց պաշտոնական պատերազմ հայտարարելու՝ հենվելով 1973 թվականի «Պատերազմական լիազորությունների մասին» օրենքի վրա, որը թույլ է տալիս մինչև 60 օր ռազմական գործողություններ իրականացնել առանց Կոնգրեսի թույլտվության։ Այս մեխանիզմը ժամանակի ընթացքում ընդլայնել է նախագահի լիազորությունները և նվազեցրել Կոնգրեսի դերը նման որոշումների կայացման հարցում։