CNN հարցում․ Ամերիկացիների կեսը կարծում է, որ ներգաղթի ծառայության գործողությունները քաղաքներն ավելի վտանգավոր են դարձնում

CNN-ի նոր հարցման համաձայն՝ ամերիկացիների զգալի մասը կարծում է, որ ԱՄՆ ներգաղթի և մաքսային վերահսկման ծառայության (ICE) գործողությունները ոչ թե բարելավում, այլ վատթարացնում են քաղաքների անվտանգությունը։ Հարցվածների 51 տոկոսը նշել է, որ ծառայության գործողությունները քաղաքներն ավելի վտանգավոր են դարձնում, մինչդեռ միայն 31 տոկոսն է կարծում, որ դրանք նպաստում են անվտանգության բարձրացմանը։

Հարցման առիթը դարձել է Մինեապոլիսում տեղի ունեցած միջադեպը, երբ ICE գործակալը կրակել և սպանել էր տեղացի բնակչուհի Ռենե Գուդին։ Ամերիկացիների 56 տոկոսը այդ կրակոցը համարել է ուժի ոչ արդարացված կիրառում, իսկ 51 տոկոսը կարծում է, որ այն ցույց է տալիս ավելի խորքային խնդիրներ ծառայության գործունեության մեջ։ Միայն 26 տոկոսն է միջադեպը գնահատել որպես արդարացված։

Միևնույն ժամանակ հարցվածների 52 տոկոսը կարծում է, որ նախագահ Դոնալդ Թրամփի իրականացրած զանգվածային արտաքսման քաղաքականությունը չափազանց կոշտ է։ Հանրային աջակցությունը Թրամփի ներգաղթային քաղաքականությանը վերջին ամիսներին նվազել է՝ հասնելով մոտ 42 տոկոսի, ինչը ցույց է տալիս աճող դժգոհություն այդ քաղաքականության նկատմամբ։